31 августа 2016 г.
Çак ятпа иртрĕ августăн 26-мĕшĕнче районти "Хастар" спорткомплексра республикăри кооператив организацийĕсен фестивалĕ. Кăçалхипе çиччĕмĕш хут иртнĕ спорт ăмăртăвне пурĕ 15 районти 16 команда хутшăнчĕ. Фестивале Чăвашпотребсоюз Канашĕн ертỹлĕхĕ тата профсоюзĕ йĕркелесе ирттерчĕç.
Спортпа туслă çемьесене Чăвашпотребсоюз председателĕ Валерий Павлов, район пуçлăхĕ Александр Степанов, район администрацийĕн пуçлăхĕ Александр Башкиров саламларĕç. Спорт уявне çемьесем виçĕ ушкăнпа хутшăнчĕç: 6-9 çулхи ачаллисем, 9-12 çулхи пĕр ачаллисем, 9-12 çулхи икĕ ачаллисем. Пĕчĕккисем те, аслисем те баскетбол ме-чĕкĕсемпе выляма пĕлнине, дартсра тĕл пенине кăтартса пачĕç, вырăнтан инçĕшне сикрĕç, тĕрлĕ чăрмавсене парăнтарчĕç, çемье эстафетинче тупăшрĕç.
Районти потребительсен обществинчен спорт фестивальне Степановсемпе Кудряшовсен çемйисем хутшăнчĕç. Икĕ ачаллă çемьесем хушшинче Кудряшовсем 1-мĕш вырăна тухма пултарчĕç. Фестивале хутшăннă пур çемье те пылак парнесене тивĕçрĕ, çĕнтерỹçĕсем - Чăвашпотребсоюз дипломĕсене тата кубоксене, хаклă парнесене.
А.КАРПОВА.
Источник: "Пирěн пурнăç"