02 сентября 2016 г.
Сисмерĕмĕр те, çуллахи каникул иртсе те кайрĕ. Виçĕ уйăх тунсăхланă шкулсем хаваслă сассемпе тулчĕç - хĕвеллĕ кунсенче канса сывлăхĕсене çирĕплетнĕ ачасем ĕнер, сентябрĕн 1-мĕшĕнче, партăсем хушшине ларчĕç. Районти пур шкулта та ĕнер савăнăçлă линейкăсем иртрĕç. 1-мĕш класа каякан 155 ачашăн пĕрремĕш хут кĕмĕл саслă шăнкăрав янăрарĕ. Сăмах май, пĕлтĕр пĕрремĕш класа каякансем 163-ĕн пулнă. Пурĕпе вара кăçал районта 1417 ача пĕлỹ сукмакне такăрлатĕ.
Хĕрлĕ Чутайри вăтам шкулта та ĕнер Пĕлỹ кунне халалланă савăнăçлă линейка иртрĕ. Кăçал кунта партăсем хушшине пурĕ 647 ача ларчĕ, вĕсенчен 67-шĕ - пĕрремĕш классем. Ачасене çĕнĕ вĕренỹ çулĕ пуçланнă ятпа ЧР Патшалăх Канашĕн депутачĕ Валерий Павлов, район пуçлăхĕ Александр Степанов, Хĕрлĕ Чутайри Турă Хĕресне Çĕкленĕ храм настоятелĕ Максим атте саламларĕç. Валерий Павлов депутат шкула пуш алăпа килмен - 1-мĕш класа каякан ачасем валли парнесем хатĕрленĕ. Унсăр пуçне Валерий Михайловичпа Александр Юрьевич кăçал Краснодар хулинче иртнĕ салтак çулне çитмен çамрăксен Пĕтĕм Раççейри Спартакиадинче 2-мĕш вырăн йышăннă командăна тата вĕсен тренерне Эдуард Романова Раççей Спорт Министерствин Дипломĕсене тата район пуçлăхĕн Тав сăмахĕсене парса чысларĕç. Эдуард Романов Валерий Павлова çĕршыв шайĕнчи ăмăртусене хутшăнма укçа-тенкĕпе пулăшнăшăн тав турĕ.
Сăмах май, Хĕрлĕ Чутай шкулĕн кадечĕсем çак уйăх варринче Анапăра иртекен ăмăртусене тухса кайĕç. Валерий Михайлович ку хутĕнче те кадетсене пулăшма шантарчĕ. Çĕнĕ вĕренỹ çулĕнче пурне те - ачасене те, вĕрентекенсемпе ашшĕ-амăшне те - ăнăçупа чăтăмлăх сунатпăр.
А.КАРПОВА.
Источник: "Пирěн пурнăç"