09 сентября 2016 г.
Республикăри потребитель кооперацинче яланах ĕç çынни хисепре. Паян Чăвашпотребсоюз тытăмĕнчи (председателĕ - Валерий Михайлович Павлов) организацисемпе предприятисенче 8 пине яхăн çын тăрăшать. Вĕсен пĕтĕмĕшле ĕç-хĕлĕн çулталăкри калăпăшĕ - 11 миллиард ытла тенкĕ. Пĕлтĕрхи кăтартупа Раççейри 76 потребсоюз хушшинче экономика ăмăртăвĕнче пирĕн Чăвашпотребсоюз 1-мĕш вырăн çĕнсе илчĕ. Раççейри Центросоюзра чи лайăх потребитель обществи кỹршĕри Элĕк райповĕ шутланать, 3-мĕш вырăнта - Ишлей райповĕ.
Сентябрĕн 7-мĕшĕнче Чăваш патшалăх оперăпа балет театрĕнче Раççейри потребитель кооперацине 185 çул çитнине тата Чăваш Енри Ĕç çыннин çулталăкне халалласа Чăвашпотребсоюз тытăмĕнче тăрăшакансен форумĕ иртрĕ. Пирĕн районтан унта 20 ытла çын хутшăнчĕ. Форума Чăваш Республикин Пуçлăхĕ Михаил Васильевич Игнатьев, Раççей Федерацийĕн Патшалăх Думин депутачĕ Алена Игоревна Аршинова, РФ Федераллă Пухăвĕн Федераци Канашĕн членĕ Вадим Иванович Николаев, "Единая Россия" политика партийĕн Чăваш Енри уйрăмĕн секретарĕ, Чăваш Патшалăх Канашĕн депутачĕ Николай Владимирович Малов, Шупашкар хула пуçлăхĕ, республикăри Муниципаллă пĕрлешỹ-сен правленийĕн председателĕ Леонид Ильич Черкесов тата ыттисем те йышлăн хутшăнчĕç, Чăвашпотребсоюз тытăмĕнчи ĕçченсене уяв ячĕпе саламларĕç, тăрăшуллисене наградăсем парса чысларĕç.
Хисепе тивĕçнисен йышĕ-нче пирĕн районти райпо тытăмĕн ĕçченĕсем те пулчĕç. Райпо Канашĕн председательне Александр Юрьевич Степанова кăçалхи чи лайăх ертỹçĕ шутне кĕртсе "Руководитель - общественный деятель" номинаципе чысларĕç, "Янтарь" тулли мар яваплă обществăн генеральнăй директорĕн çумĕ Раиса Борисовна Еклакова (сăнỹкерчĕкре - 1 стр.) Чăваш Республикин Ялхуçалăх министерствин Хисеп грамотине тивĕçрĕ, "Чăваш Енри потребитель кооперацийĕн чи лайăх лавкки _ йышăну-хатĕрлев пункчĕ" ята Туканашри лавкка (заведующийĕ - Римма Ивановна Кудюкова ) илчĕ.
Театрăн фойинче курав йĕркеленĕ, Чăвашпотребсоюз тытăмĕнчи районсенчи потребитель обществисен ĕçченĕсем хăйсен ĕçĕнчи пултарулăхĕ-пе паллаштарчĕç, çав йышра пирĕн райпон повар-кондитерĕсем те пулчĕç, вĕсем те хисепе тивĕçрĕç.
Палăртма кăмăллă, форумăн программи пуян пулчĕ, хитре, савăнăçлă, çỹллĕ шайра иртрĕ. Мероприятие йĕркелекенсем чăнни-пех мухтава тивĕç. Чăвашпотребсоюз йĕркеленĕ уявсене пĕрмаях хутшăнма тивнĕ май, вĕсем ĕçе тĕплĕ те кăмăлпа тунине çирĕппĕнех калама пултаратăп.
А.ОРИНОВА.
Источник: "Пирěн пурнăç"