09 сентября 2016 г.
Ытларикун, сентябрĕн 6-мĕшĕнче, Чăваш Енри прессăн спорт фестивалĕн пĕрремĕш тапхăрĕ иртрĕ. Кăçалхипе çиччĕмĕш хут иртекен прессăн спорт фестивалĕ - çăмăл атлетика чупăвĕ - "Пирĕн пурнăç" парнисене çĕнсе илессишĕн тата А.Г.Николаев летчик-космонавта асăнса иртрĕ. Çавна май кăнтăрла иртсен Хĕрлĕ Чутай салин Тĕп стадионĕ спортпа тата район хаçачĕпе тачă çыхăну тытакан шкул ачисемпе, тĕрлĕ çĕрте ĕçлекенсемпе тулчĕ. Спорт сывлăха та, туслăха та çирĕплетет Кăçалхипе çиччĕмĕш хут иртнĕ спорт уявне пухăннисене район пуçлăхĕ Александр Степанов, райадминистраци пуçлăхĕ Александр Башкиров, район хаçачĕн тĕп редакторĕ Алина Оринова, район прокурорĕ Валерий Шоркин, ăмăртусен тĕп судйи Алексей Никитин саламларĕç, спортсменсене ăнăçу сунчĕç.
Кăçал ытти çулсенчи пек VIP-чупу пулмарĕ, анчах та ăмăртусем пуçланиччен туслăх чупăвĕ иртрĕ - спорт фестивальне пухăннисем пурте стадион тавра чупса çаврăнчĕç. Кăçалхи улшăнусем шутне çавăн пекех чи малтан старта шкул çулне çитменнисем тăнине кĕртмелле. "Пилеш" ача садне çỹрекен Софья Петрова, Матвей Митрофанов, Никита Секайкин, Аня Еклакова ачаранах спортпа туслă пулнине кăтартса пачĕç. Вĕсене эстафетăна хутшăнма пулăшнă Татьяна Кондратьевана та тав сăмахĕ каламалла.
Унтан старта спорт çемйисем тухрĕç. Кăçал вĕсем темшĕн пĕлтĕрхинчен сахал пулчĕç. Апла пулин те Калкассинчи Алексеевсем, Кỹпешри Логиновсем, Çĕн Атикассинчи Алексеевсем эстафетăна кăмăлпах хутшăнчĕç. Виçĕ çемйи те "Пирĕн пурнăç" район хаçатне çитес çулта çур çул хушши тỹлевсĕрех илсе тăрĕ.
Ытти ушкăнсенчи эстафетăсенче вара чи вăйлисем, хăвăртраххисем çаксем пулчĕç: - Пĕтĕмĕшле пĕлỹ паракан тĕп шкулсем хушшинче ăмăрту питĕ çивĕч иртрĕ. Ку ỹсĕмри ачасем хушшинче Тури Çĕрпỹкассинчи шкулта вĕренекенсем пĕрремĕш вырăн йышăнчĕç, шулюсем - иккĕмĕш, хусанушкăньсем виççĕмĕш пулчĕç.
- Вăтам шкулсем хушшинче Хĕрлĕ Чутай шкулĕн спортсменĕсене çитекенни пулмарĕ, иккĕмĕш вырăна Çĕн Атикасси шкулĕн команди тухрĕ, виççĕмĕшне - Атнар шкулĕ.
- Хĕрарăмсем хушшинче "Пилеш" ача сачĕн пикисем чи маттурисем пулчĕç, райпо команди иккĕмĕш тухрĕ, "Хĕвел" ача сачĕн пикисем - виççĕмĕш.
- Арçынсен ушкăнĕнче пуринчен те хăвăртрах райпо команди чупрĕ, районти полици уйрăмĕн ĕçченĕсем иккĕмĕш пулчĕç, райадминистраци команди - виççĕмĕш.
- Ял тăрăхĕсен пĕрлештернĕ командисем хушшинче мăнэтменсем палăрчĕç, иккĕмĕш вырăна питĕр-кассисем тухрĕç, виççĕмĕш вырăна Кив Атикассипе Ачкасси ял тăрăхĕсем пайларĕç. Кунта Мăн Этмен ял тăрăхĕн пуçлăхне Татьяна Артемьевана мухтаса хăварас килет - прессăн спорт фестивальне кашни çулах хутшăнать, хăйсен ял тăрăхĕнчи командăпа пĕрле старта тухать.
- Тĕп ушкăнра предприятисемпе организацисен командисем вăй виçрĕç, кунта райпо команди палăрчĕ. Администраци ĕçченĕсем иккĕмĕш пулчĕç, район больницин команди - виççĕмĕш.
Çĕнтерỹçĕсем пурте район администрацийĕпе редакци грамотисене тивĕçрĕç. Унсăр пуçне мала тухнисене "Пирĕн пурнăç" район хаçачĕ пĕр хутчен тỹлевсĕр салам е пĕлтерỹ пичетлеме ирĕк паракан купон парнелерĕ. Сăмах май, çак купонпа хуть те хăш вăхăтра та усă крума юрать.
Источник: "Пирěн пурнăç"