09 сентября 2016 г.
Спорт уявне кăçал пурĕ 200 яхăн спортсмен хутшăнчĕ. Тỹрех каламалла, ку пĕлтĕрхинчен сахалрах. Темшĕн-çке кăçал старта шкулсенчи физкультура учителĕсем те сахаллăн тухрĕç. Ытти çулсенче вĕсене ырă тĕслĕх кăтартаççĕ, çапла майпа ачасене спортпа туслашма пулăшаççĕ тесе мухтаттăмăр, кăçал вара эстафетăна Мишеркасси шкулĕн физкультура учителĕ Владимир Храмов кăна хутшăнчĕ. Чылай учитель стадиона пыма та вăхăт тупайман... Шкулсен хăш-пĕр командисем тата наградăсем панă çĕре те юлмарĕç - те таçта хытах васкарĕç? Район хаçачĕн купонĕсем те кирлĕ пулмарĕç пулас вĕсене. Парнисем вара хуçисене редакцинче халĕ те кĕтеççĕ.
Тĕрлĕ шайри ертỹçĕсем те старта сахаллăн тухрĕç. Ытти çулсенче ял тăрăхĕсен пуçлăхĕсем, шкул директорĕсем эстафетăна хутшăнмасан та стадиона пыраканччĕ, хăйсен командисене хавхалантараканччĕ. Кăçал вĕсен пĕлтерĕшлĕрех ĕçсем тупăннă пулас, йăлана кĕнĕ спорт уявне вăхăт уйăрайман. Апла пулин те, спорта юратакансене пĕрлештерекен фестиваль пурне те савăк кăмăл парнелерĕ. Ан тив, пурте мала тухаймарĕç, чи кирли, чи пахи - пирĕн хушăра спорта юратакансем, сывă пурнăç йĕркине тытса пыракансем чылай пулни. Вĕсем хăйсен тĕслĕхĕпе ыттисене те спорта юратма чĕнеççĕ.
Çĕнтерỹсем вара пирĕн - малалла! Чăваш Енри прессăн спорт фестивалĕн районти тапхăрĕнче палăрнисем ыран, сентябрĕн 10-мĕшĕнче, пирĕн паллă ентеше Андриян Григорьевич Николаев летчик-космонавта асăнса иртекен спорт фестивалĕн Шупашкарта иртекен иккĕмĕш тапхăрне хутшăнĕç. "Советская Чувашия" хаçат парнисемшĕн иртекен 78-мĕш эстафетăна хĕрлĕчутайсем тивĕçлĕ хутшăнасса шанатпăр.
Алина КАРПОВА.
Источник: "Пирěн пурнăç"