14 сентября 2016 г.
Райпо çĕнĕ объектсем хута ярсах тăрать
Районти потребительсен обществи суту-илỹ тытăмне аталантарас тесе тăрăшать, çак тĕллевпех кунта тăтăшах çĕнĕ объектсем хута каяççĕ. Нумаях пулмасть, акă, район центрĕнчи "Встреча" кафере çĕнĕ зал уçăлнăччĕ. Сентябрĕн 12-мĕшĕнче вара Атнарти "Залив" кафере хушма зал уçăлчĕ.
Аса илтеретпĕр, "Залив" кафе 2012 çулта хута кайрĕ. Унта çынсем тăтăшах пырса çỹрени ку халăхăн юратнă кану вырăнĕ пулнине çирĕплетсе панă. Анчах та кафе залĕ кăмăл тăвакансене пурне те вырнаçтарайман, çавăнпа та çынсем райпо ертỹлĕхне кафе пỹлĕмĕсене пысăклатса пама ыйтнă.
Каланă - тунă. Кĕске хушăра, икĕ уйăх хушшинче, хушма зала туса пĕтернĕ. Ăна савăнăçлă лару-тăрура уçнă çĕре атнарсемпе пĕрле ЧР Патшалăх Канашĕн Председатель çумĕ Николай Малов, ЧР Патшалăх Канашĕн депутачĕ, Чăвашпотребсоюз ертỹçи Валерий Павлов, район пуçлăхĕ, райпо Канашĕн председателĕ Александр Степанов, райадминистраци пуçлăхĕ Александр Башкиров, Атнар ял тăрăхĕн пуçлăхĕ Александр Кузнецов хутшăннă. Атнарсем çĕнĕ, çутă та илемлĕ залпа кăмăллă.
Çыннăн ĕçлеме кăна мар, канма та вăхăт пулмалла. Малашне "Залив" кафере юбилей е пĕр-пĕр уява паллă тума татах та меллĕрех, хăтлăрах пулĕ.
А.КАРПОВА.
Источник: "Пирěн пурнăç"