14 сентября 2016 г.
Чăваш Ен çĕршер-çĕршер çул хушши тĕрлĕ халăхлă тата тĕн тĕлĕшĕпе лăпкă аталанса пыракан çĕршыври регион шутланать. Кунта çĕр ытла наци халăхĕ пĕр-пĕринпе килĕштерсе пурăнать.
Чăваш Республикин Пуçлăхĕ август уйăхĕн 2-мĕшĕнче алă пуснă хушура палăртнă тăрăх, съезда Раççей Федерацийĕн Президенчĕн "Раççейĕн 2025 çулчченхи патшалăх наци политикин стратегийĕ çинчен" Указĕпе килĕшỹллĕн йĕркеленĕ. Съезд сентябрĕн 10-мĕшĕнче Чăваш патшалăх оперăпа балет театрĕнче иртрĕ.
Малтанах пухăннисем "Чăваш Ен - пуриншĕн те пĕр кил" кино курчĕç. Унтан пухăннисем тĕрлĕ йышăнусем турĕç. Вĕсем республикăра пурăнакан халăхсен наци культурине аталантарас тата сыхласа хăварас, конфессисем тата национальноçсем хушшинче мирпе килĕшĕве çирĕплетме пулăшĕç.
2010 çулхи Халăх çыравĕн кăтартăвĕсемпе пирĕн республикăра 128 национальность представителĕ тата сакăр халăх ушкăнĕ пурăнать. Наци йышĕ çакăн пек: чăвашсем - 67,7 процент, вырăссем - 26,9 процент, ту-тарсем - 2,8 процент, марисем - 0,4 процент, ытти национальноçсем 2 процента яхăн.
Съездра республикăри обществăлла пĕрлешỹсен хастар ертỹçисемпе членĕсем, вăл шутра Чăваш наци конгресĕн Президиумĕн членĕ Елена Османова (пирĕн ентеш) ЧР Пуçлăхĕн Тав çырăвне тивĕçрĕç. Съездра çавăн пекех çĕршывра, республикăра пурăнакан тĕрлĕ халăх чĕлхипе çырнă кĕнекесемпе вĕренỹ пособийĕсен куравĕсем, этнографи куравĕсемпе экспозицийĕсем, пултарулăх ĕçĕсен, наци апат-çимĕçĕн куравĕсем ĕçлерĕç.
Альбина ЗАМУТКИНА.
Источник: "Пирěн пурнăç"