16 сентября 2016 г.
Ленинград облаçĕнчи Гатчина хулинче Раççей потребкооперацине 185 çул çитнине халалланă савăнăçлă мероприяти иртнĕ. Унта Чăвашпотребсоюз делегацийĕ те хутшăннă. Уявра потребкоопераци тытăмĕнче лайăх енчен палăрнисене тĕрлĕ наградăсем парса чысланă.
Раççей Центросоюзĕн членне, Чăвашпотребсоюз председательне, ЧР Патшалăх Канашĕн депутатне Валерий Павлова Раççей Федерацийĕн потребительсен кооперацийĕн аталанăвне пĕлтерĕшлĕ тỹпе хывнăшăн Патшалăх Думин Федераллă Пухăвĕн председателĕн Сергей Нарышкинăн Тав сăмахне панă.
Çавăн пекех Чăвашпотребсоюз Пĕтĕм Раççейри экономика ăмăртăвĕнче 2016 çулхи 2-мĕш квартал кăтартăвĕсемпе 2-мĕш вырăн йышăннăшăн Диплома тивĕçнĕ. Чăвашпотребсоюзăн Шупашкарти кооператив техникумĕ вара Центросоюзăн пахалăх маркине тивĕç пулнă.
Уявра тем тĕрлĕ курав ĕçленĕ, унта çĕршыври кооператорсем туса кăларакан таварпа, çав шутра "Чăвашпотребсоюзăн Етĕрнери аш-какай комбиначĕ" ТЯО туса кăларакан продукципе, паллашма май пулнă.
Н.АНТОНОВА.
Источник: "Пирěн пурнăç"