23 сентября 2016 г.
Çĕнĕ вĕренỹ çулĕ пуçланчĕ. Ашшĕ-амăшĕн августри тăр-машăвĕ хыçалта. Сывлăх пирки шутлассине те хыçала хăваратпăр: прививкăсем тунă... Ытлашши кулянмалли çук. Çак енчен ашшĕ-амăшĕ тĕрĕс утăмсем тăвать-ши? Кун пирки Раççейри Сывлăх сыхлавĕн министерствин ачасемпе тата çамрăксемпе ĕçлекен тĕп гинекологпа, профессорпа Елена Уваровапа калаçрăмăр.
- Елена Витальевна! Ачасен çи-пуçĕнчен пуçлар-ха калаçăва. Шкула хĕрачасен юбка е йĕм тăхăнмалла? Çак ыйту паян çивĕччисен шутĕнче. Эсир мĕн шутлатăр?
- Эпĕ иккĕшне те хирĕç мар. Анчах та гигиенăпа эстетика йĕркисене пăхăнмалла. Паллах, шкулта кĕске юбка тата "çĕтĕк" джинсы тата шорты тăхăнса çỹрени килĕшỹсĕр. Сивĕ те çумăрлă çанталăкра хĕрачасен йĕм тăхăнмаллах. Ашшĕ-амăшĕн хĕрачана пĕчĕклех упрама тăрăшмалла.
- Кăна мĕнле ăнланмалла? - Хĕрачан сывлăхне пĕрремĕш хут çуралсанах тĕрĕслемелле: организм аталанăвĕ йĕркеллĕ е çук.
- Елена Витальевна, пĕтĕмпех йĕркеллĕ пулсан хĕрачана гинеколог сăнавĕ кирлĕ-ши?
- Питĕ кирлĕ. Йĕркепе килĕшỹллĕн хĕрачан 3, 7, 12, 14, 15, 16, 17 çулсем тултарсан гинеколог патĕнче тĕрĕсленмелле. Шел те, нумай ашшĕ-амăшĕ кун пирки пĕлмеççĕ-ха. Ашшĕ-амăшĕнчен пĕрмаях хĕрачана 3 çулта тата шкула кайиччен гинеколог патĕнче тĕрĕсленни пирки ыйтсан ытларахăшĕ: "Мĕн тума? Манăн хĕрача сывлăхлă. Вăл йĕркеллĕ пурнăçпа пурăнать. Мĕншĕн унăн гинеколог патĕнче тĕрĕсленмелле?" - теççĕ.
- Мĕншĕн?
- Хĕрачасем те хĕрарăмсен чирĕсемпех асапланаççĕ. Сăмахран, юлашки вăхăтра хĕрачасем ытлашши самăрланни е кĕлетке-çурăмăн йывăрăшĕ вĕсен самаях пĕчĕк пулни ашшĕ-амăшне пăшăрхантарни те сисĕнет.
- Нумаях пулмасть 16 çулхи хĕрĕ (çỹллĕшĕ - 160 см) 38 кг çеç тайни пирки ялта пурăнакан пĕр амăш пăшăрхануллă çыру янăччĕ. - Хальхи хĕрсенчен ытларахăшĕ "модель" пек пуласшăн. Апат çимесĕр хăйсен организмне пĕтереççĕ. Калас пулать, специалистсем сăнанă май, юлашки вăхăтра кĕлетке-çурăмăн йывăрăшĕ самаях пĕчĕк пулни кайран ача çуратайми патне çитерни палăрать.
- Елена Витальевна! Ялта пурăнакан амăшĕн çырăвĕ патнех таврăнар. Килĕшĕр, кашни яллă районсенче ачасемпе тата çамрăксемпе ĕçлекен ятарлă гинеколог çук. Çав амăшĕн камран пулăшу ыйтмалла?
- Районсенче ку енĕпе гинекологсем е ятарлă вĕреннĕ педиатрсем ĕçлеççĕ. Гинекологсем хĕрачасене те, хĕрсене те, хĕрарăмсене те пăхса тĕрĕслеççĕ. Сывлăхлă пулассин 10 проценчĕ медицина ĕçченĕсенчен килет, ытти - хамăртан. Çавăнпа та сывлăха упрама çуралсанах пуçламалла...
Пирĕн район больницинче врач-гинекологра иккĕн тăрăшаççĕ: Галина Игнатьевна Журавлевапа Наталья Владиславовна Паденова. Иккĕшĕ те опытлă. Асăннă врачсем халăхпа яланах вашават, сăпайлă. Хăйсен ĕçне юратса та тỹрĕ кăмăлпа пурнăçлаççĕ. Гинекологи уйрăмĕнче яланах йĕрке, тирпейлĕх хуçаланать. Çавна пулах районта пурăнакансем вĕсем пирки яланах ырă сăмахсем калаççĕ. Шăпах çак гинекологи уйрăмĕнче тĕрĕсленеççĕ те 3 çултан пуçласа пирĕн хĕрачасем, хĕрсем тата хĕрарăмсем.
Источник: "Пирěн пурнăç"