28 сентября 2016 г.
Маттур, кадетсем!
Хĕрлĕ Чутай шкулĕн 11-мĕш кадет класĕнче вĕренекенсем сентябрĕн 19-24-мĕшĕсенче Анапăра иртнĕ Пĕтĕм Раççейри шкул ачисем хушшинчи вăй-хал хатĕрленĕвĕн смотрĕнчен çĕнтерỹпе таврăнчĕç. Пысăк шайри ăмăртусене Эдуард Романов тренер хатĕрленĕ команда хутшăнчĕ, вăл шутра вунă каччă - Станислав Михопаркин, Алексей Дадюков, Ярослав Зайцев, Иван Пименов, Юрий Степанов, Константин Секайкин, Юрий Тимофеев, Виктор Пименов, Юрий Яндайкин, Юрий Дмитриев тата икĕ хĕр - Кристина Васькова, Евгения Герасимова.
Патшалăхăн "Юность России" пĕрлешĕвĕ йĕркелесе ирттернĕ ăмăртусенче шкул ачисем ГТО нормативĕсене панă тата Олимп юхăмĕпе çыхăннă теори конкурсне хутшăннă. Нумай енлĕ ăмăртусен пур тĕсĕсемпе те (100, 2000, 3000 метра чупасси, 50 метра ишесси, турник çинче туртăнасси тата выртнă çĕртен кĕлеткене çĕклесси) хĕрлĕчутайсен чи лайăх кăтартусем пулнă, вĕсем ГТО-н 48 ылтăн паллине тивĕçнĕ.
Уйрăм кăтартусем те савăнтараççĕ: турник çинче туртăнса Юрий Степановпа Виктор Миронов, 3000 метра чупса Алексей Дадюков виççĕмĕш вырăн йышăннă; ишессипе Евгения Герасимова хĕрсем хушшинче иккĕмĕш пулнă, каччăсем вара бассейнра пурне те хыçала хăварнă - 1-3-мĕш вырăнсене Юрий Тимофеев, Юрий Яндайкин, Алексей Дадюков йышăннă. Юрий Степанов нумай енлĕ ăмăртусен тăватă тĕсĕпе те пĕрремĕш вырăн йышăннă, Алексей Дадюков - иккĕмĕш. Командăн пĕтĕмĕшле кăтартăвĕсем чи лайăххисем пулнăран тăван шкулăн, районăн, Чăваш Республикин чысне хỹтĕленĕ хĕрлĕчутайсем пьедесталăн пĕрремĕш картлашки çине хăпарнă. Иккĕмĕш вырăна Волгоградри лицейра вĕренекен спортсменсем тухнă, виççĕмĕшне - Оренбургри лицейра ăс пухакансем.
Хура тинĕс хĕрринче пулса ăмăртусене тивĕçлĕн хутшăнни, çав хушăрах канма та вăхăт тупни ачасене сывлăхне çирĕплетме, тавракурăмне анлăлатма пулăшнă. Хăйсем тăрăшсан, аслисем пулăшсах тăрсан, ăнлан-сан пирĕн кадетсем малашлăхра татах çитĕнỹсемпе савăнтарĕç.
Алина КАРПОВА.
Источник: "Пирěн пурнăç"