30 сентября 2016 г.
Паянхи кун районта 5918 пенсионер шутланать, вĕсен шутĕнче - 2722 ĕç ветеранĕ, 160 тыл ĕçченĕ, Тăван çĕршывăн Аслă вăрçин участникĕ - 10.
Ĕç ветеранĕсемпе тыл ĕçченĕсем, вăрçă участникĕсем пурте федераци тата регион паракан çăмăллăхсемпе усă кураççĕ. Çавăн пекех сахал тупăшлă пенсионерсене кил-çурта хутса ăшăтма субсиди параççĕ. Вăрçă участникĕсемпе салтак арăмĕсене хăтлă хваттер туянма е çурт лартма сертификатсемпе тивĕçтереççĕ. Ветерансем хăйсен сывлăхне "Вега" санаторинче çирĕплетме пултараççĕ.
Ĕçпе вăрçă ветеранĕсем, тивĕçлĕ канури ватăсем нумай çул тỹрĕ кăмăлпа ĕçлесе юхăннă çĕршыва ура çине тăратма пулăшнă. Хальхи вăхăтра та вĕсем алă усса лармаççĕ. Вăй çитнĕ таран ĕçлесе ачисене пулăшма тăрăшаççĕ. Канма та, ĕçлеме те пултараççĕ. Ветерансенчен чылайăшĕ районти мероприятисене хутшăнать, юрлать, ташлать. Атнар, Этмен, Хĕрлĕ Чутай ял тăрăхĕсенчи ветерансене район сцени çинче те тăтăшах курма пулать. Спортпа та туслă пирĕн пенсионерсем. Илья Иванов, Валентин Харитонов, Людмила Михуткина, Александр Волков, Владимир Ульянов район тата республика шайĕнче иртекен спорт ăмăртăвĕсенче малти вырăнсене йышăнаççĕ. Сергей Баринова, Евдокия Сергеевана, Елизавета Грузинована районти чи активлă ветерансем тесе калас килет.
Хисеплĕ ветерансем! Пĕтĕм тĕнчери ватă çынсен кунĕ ячĕпе саламласа çирĕп сывлăх, вăрăм ĕмĕр сунатăп. Хăвăр чунтан юратакан тата пулăшса пыракан çывăх çыннăрсем яланах юнашар пулччăр.
Галина ТИМАКОВА, районти ветерансен канашĕн председателĕ.
Источник: "Пирěн пурнăç"