05 октября 2016 г.
Ачасене пĕлỹ тĕнчи тăрăх утма пулăшакансене тата вĕсене тивĕçлĕ воспитани пама тăрăшакансене халалланă уяв паян Хĕрлĕ Чутайри вăтам шкулта иртет. Йăлана кĕнĕ тăрăх, унта учительсем тĕрлĕ шайри наградăсене тивĕçеççĕ. Паянхи уявра сумлă наградăна тивĕçекеннисем - Хĕрлĕ Чутайри вăтам шкул вĕрентекенĕ Ирина Захарова тата Мăн Этмен шкулĕн вĕрентекенĕ Галина Кукушкина.
Нумай çул хушши тивĕçлĕ тата кăтартуллă ĕçлесе пынăшăн Ирина Захарована "Раççей Федерацийĕн пĕтĕмĕшле вĕрентĕвĕн хисеплĕ ĕçченĕ" сумлă ят панă. Ирина Евгеньевна Хĕрлĕ Чутайри вăтам шкулта 1993 çултанпа ĕçлет. Хăй вăхăтĕнче Чăваш патшалăх педагогика институтĕнче вĕренсе алла ỹнер искусствипе ĕç, черчени учителĕн дипломне илнĕ. 2012 çултанпа Ирина Захарова кадет класĕн ертỹçи. Паянхи кун 11-мĕш класра вĕренекен кадетсен тĕрлĕ шайри çитĕнĕвĕсенче унăн тỹпи те пысăк, мĕншĕн тесен вăл ачасене тивĕçлĕ воспитани парас тесе чунтан тăрăшать, вĕсене ĕçчен, ырă кăмăллă пулма, аслисене хисеплеме вĕрентет. Класс ертỹçи пулнипе пĕрлех Ирина Евгеньевна ачасене ỹнер искусстви, технологи, тĕнчен ỹнер культури, графика (черчени), тĕн культурипе этика предмечĕсене вĕрентет, професси суйласа илме пулăшать. Унăн вĕренекенĕсем район тата республика шайĕнчи олимпиадăсенче, пултарулăх конкурсĕсенче палăраççĕ.
Ирина Захарова хушма пĕлỹ парассипе те тăрăшать, Ачасен пултарулăх çуртĕнче кружок ертсе пырать.
Пултаруллă педагог хăй те тăтăшах тĕрлĕ конкурссене хутшăнать. Ачасене пĕлỹпе воспитани парас ĕçре çитĕнỹсемпе палăрнăшăн 2008 çулта вăл РФ Вĕренỹ министерствин Хисеп грамотине тивĕçнĕ. 2012 çулта Ирина Захарована кадетсене республи-кăри кĕркуннехи тĕрĕслеве аван хатĕрленĕшĕн ЧР Вĕренỹ министерствин Хисеп грамотипе наградăланă. 2013 çулта район шайĕнче иртнĕ "Çулталăк учителĕ" конкурсра çĕнтернĕ. Çав çулах унăн сăнне районăн Хисеп хăми çинче курма пулчĕ. Пĕлтĕр вара ЧР Патшалăх Канашĕн депутачĕн Николай Маловăн ятран паракан стипендине илсе тăнă.
Алина КАРПОВА.
Источник: "Пирěн пурнăç"