07 октября 2016 г.
Октябрĕн 6-мĕшĕнче пирĕн юратнă та хаклă вĕрентекенсем хăйсен професси уявне паллă турĕç. Хĕрлĕ Чутайри вăтам шкулта иртнĕ уявра мал ĕмĕтлĕ, пуçаруллă, хăйсен ĕçне чунтан парăннă учительсем тĕрлĕ хисеп хучĕсене тивĕçрĕç.
Хаçатăн иртнĕ номерĕнче Хĕрлĕ Чутай шкулĕнчи Ирина Захаровапа Мăн Этмен шкулĕнчи Галина Кукушкина "Раççей Федерацийĕн пĕтĕмĕшле вĕрентĕвĕн хисеплĕ ĕçченĕ" хисеплĕ ята тивĕçнине пĕлтернĕччĕ, вĕсене уявра ЧР культура министрĕн çумĕ Вячеслав Оринов саламласа чысларĕ.
Мăн Этменти вăтам шкулта пуçламăш классене вĕрентекен Галина Геннадьевна Кукушкинан педагогика стажĕ 36 çулпа танлашать. Пĕрремĕш категориллĕ учитель хальхи вăхăтра 2-мĕш классене вĕрентет. Галина Геннадьевнăн вĕренекенĕсем тăтăшах район тата республика шайĕнчи олимпиадăсемпе конкурссене хутшăнаççĕ. Тăватă ача "Чĕвĕлти чĕкеç" конкурсра çĕршыв шайĕнче пĕрремĕш вырăн йышăнма пултарнă, виççĕшĕ - республика шайĕнче. Район шайĕнчи предмет олимпиадисемпе конкурссенче унăн вĕренекенĕсем 17 хутчен пĕрремĕш вырăн йышăннă. Ĕçри çитĕнỹсемшĕн Галина Кукушкина 1990 çулта Чăваш АССР-ĕн халăх вĕрентĕвĕн министерствин Хисеп грамотине тивĕçнĕ.
Савăнăçлă уявра çавăн пекех Ачасен пултарулăх çурчĕн директорĕ Валентина Матвеевна Коракова вĕренекенсене техника моделированийĕпе кăсăкланма условисем туса панăшăн Чăваш Республикин Вĕренỹ министерствин Тав сăмахне тивĕçрĕ.
Районти 10 педагогика ĕçченне - Шулю шкулĕнчи историпе географи учительне Галина Алексеевна Бровкинана, Мăн Этмен шкулĕнче чăваш чĕлхипе литература вĕрентекен Татьяна Васильевна Горбунована, Хусанушкăнь шкулĕнчи географи учительне Альбина Александровна Макарована, Тури Çĕрпỹкассинчи шкулта историпе обществознани вĕрентекен Марина Анатольевна Максимована, Хĕрлĕ Чутайри вăтам шкулта пуçламăш классене вĕрентекен Лилия Александровна Матвеевана, Мишеркасси шкулĕнчи физика учительне Владимир Владимирович Храмова, Питĕркасси шкулĕн директорне Алина Валерьевна Белована, Атнар шкулĕн директорне Сергей Иванович Кудряшова, районти Ачасен искусство шкулĕн директорне Венера Вячеславовна Молодейкинана, Шулю шкулĕн директорне Маргарита Ивановна Чамжайкинана - вĕрентĕве аталантарас ĕçре çитĕнỹсем тунăшăн ЧР Патшалăх Канашĕн депутачĕ Николай Малов преми парса чысларĕ. Вĕсем ку вĕренỹ çулĕнче уйăхсерен пиншер тенкĕ илсе тăрĕç.
Район пуçлăхĕн Александр Степановăн Тав сăмахне Мăн Этмен шкулĕнче пуçламăш классене вĕрентекен Надежда Мефодьевна Фадеева тивĕçрĕ. Район администрацийĕн Хисеп грамотине Питĕркасси шкулĕнче пуçламăш классене вĕрентекен Алена Дмитриевна Галкина илчĕ. Райадминистрацин вĕренỹ пайĕн грамотине Хĕрлĕ Чутай шкулĕнче пуçламăш классене вĕрентекен Валентина Петровна Герасимова, Тури Çĕрпỹкасси шкулĕнче вырăс чĕлхипе литература вĕрентекен Светлана Никандровна Герасимова, Атнар шкулĕнче пуçламăш классене вĕрентекен Тамара Георгиевна Кочеганова тивĕçрĕç.
Районти вĕренỹ ĕçченĕсен профсоюз организацийĕн Хисеп грамотине Шулю шкулĕнче чăваш чĕлхипе литература вĕрентекен Галина Ивановна Тарасова тивĕçрĕ.
Уявра салам сăмахĕсем нумай янăрарĕç, ачасен пултарулăх ушкăнĕсем хăйсен ташши-юррисемпе савăнтарчĕç.
А.КАРПОВА.
Источник: "Пирěн пурнăç"