Публикации » Мăнэтменсем чăвашла хитре юрлаççĕ

12 октября 2016 г.

Октябрĕн 8-мĕшĕнче Шупашкарта Трактор тăвакансен керменĕнче Учитель кунне халалланă уяв иртнĕ. Савăнăçлă мероприятие республикăри учитель хорĕсен конкурсĕн финалĕ тăснă. Виççĕмĕш çул ĕнтĕ Чăваш Ен педагогĕсем хăйсен пултарулăхне сцена çинче те кăтартаççĕ. Учительсен 13 хорĕ пурĕ вырăсла тата чăвашла 17 юрă шăрантарнă. Пирĕн районтан асăннă конкурса Мăн Этмен шкулĕнчи учительсен хорĕ хутшăннă. Унччен вĕсем пултарулăх конкурсĕн Çĕмĕрле хулинче иртнĕ зонăри тапхăрĕнче палăрнăччĕ, çавна май республика шайĕнчи ăмăртăва хутшăнмалли ирĕке çĕнсе илнĕччĕ. Валерий Иванович Ярабаев ертсе пыракан хор ку хутĕнче те "Савăнăç юррине" шăрантарса панă. "Конкурсăн тематикипе килĕшсе тăракан чăваш юрри" номинацире мăнэтменсем патăрьелсемпе тата шупашкарсемпе пĕрле çĕнтернĕ. "Раççейри Кино çулталăкне халалланă юрă" номинацире Вăрмар районĕн вĕрентекенĕсем палăрнă. "Ĕç çыннин çулталăкне халалланă юрă" номинацире канашсем мала тухнă. Пирĕн вĕрентекенсем сцена çине тухса хăйсен пултарулăхĕпе районта кăна мар, республикăра та палăрма пултарнине ырламалла кăна. Астăвасса, ĕлĕкрех учительсем шкул ачисемпе пĕрле тăтăшах сцена çине тухатчĕç, вĕренекенĕсене ырă тĕслĕх кăтартатчĕç. Районти педагогсене малашне те хăйсен пултарулăхĕпе, ташши-юррипе савăнтарсах тăма сĕнес килет.

А.КАРПОВА.

Источник: "Пирěн пурнăç"