14 октября 2016 г.
Çак хĕрарăм çине пăхсассăн нимĕнле майпа та 90-ран иртнĕ теме хăюлăх çитмест. Чăннипе вара Ачкассинче пурăнакан Перасковия Ивановна Васюкова октябрĕн 10-мĕшĕнче 95 çул тултарнă. Çавна май Ачкасси ял тăрăхĕн пуçлăхĕнчен, тус-юлташĕнчен ăшă саламсем йышăннă.
Шел пулин те, Перасковия Васюкована çемьеленсе, ача-пăчаллă пулса пурăнма пỹрмен. Çавăнпах пулĕ вăл, пĕрремĕш ушкăн инваличĕ (куç курманнипе), нумай çул хушши Березовкăри вăхăтлăх пурăнмалли çуртра хỹтлĕх тупнă. Перасковия Ивановна - районти ветерансен хорĕн чи аслă участникĕ. Унта вăл 2000 çултанпа юрлама çỹрет.
Паянхи кун Перасковия Ивановна Ачкасси ялĕнче пурăнать, ăна тăванĕ Р.П.Васюкова пăхса, пулăшса тăрать. Çулĕсене пăхмасăр вăй, ăс-тăнпа сăпайлăха упраса хăварма пултарнă Перасковия Ивановна, сывă пурнăç йĕркине тытма тăрăшать, тăван пиччĕшĕн хĕрĕпе Раиса Петровнăпа районти физкультурăпа спорт комплексне час-часах çỹрет. Çакă тата пурнăçа юратни вăрăм кун-çулпа киленсе пурăнма май парать ăна.
А.ДМИТРИЕВА.
Источник: "Пирěн пурнăç"