14 октября 2016 г.
Районта хальхи вăхăтра театр пултарулăхĕн "Асамлă чаршав" фестивалĕ пырать. Ăна районти Культура çурчĕн Çамрăксен халăх театрĕ Ефим Никитин пьеси тăрăх лартнă "Хуняма" спектакльпе уçнă. Унтан штанашсем Николай Угарин çырнă "Тĕпсĕр сăпкари ача сасси" пьеси тăрăх спектакль лартса панă.
Октябрĕн 12-мĕшĕнче вара сцена çине киватикассисем тухрĕç. Вĕсем Александр Кăлкан пьеси тăрăх лартнă "Шыври..." комеди кăтартрĕç. Спектакле лартаканĕ - Кив Атикассинчи Культура çурчĕн заведующийĕ Николай Данилов. Шыври тесе чăвашсем вутăшпие (русалкăна) калаççĕ иккен. Анчах та шыври япăх сăнар, вăл çынсене улталать, чееленсе усал ĕçсем тăвать. Спектакльте çакăн пек çын пур, вăл - Маргарита Карповна Акулова (Людмила Шишкова вылярĕ), хăйĕн упăшкине саккун умĕнче явап тытассинчен хăтарас тесе тем тума та хатĕр. Çакна пула таса çынсен ячĕ вараланасси те чармасть усал шухăш тытнă хĕрарăма. Юрать-ха, юлашкинчен Маргарита мĕнлерех çын пулнине пурте ăнланса илеççĕ...
Палăртса хăвармалла, Людмила Шишкова хăйĕн рольне асра юлмалла калăпласа пачĕ. Ытти артистсем те - Вячеслав Бармин (Андрей Иванович Крутов, журналист), Елизавета Никитина (Люба, Крутовăн арăмĕ), Николай Данилов (Гурий Антонович Мохнатов, художник), Алина Тиверкина (Вера), Эльвира Петрова (Надежда Петровна, учительница), Мария Аксакова (Яхруç), Николай Миронов (Пулькин, вăлах Пушкин, фотограф) хăйсене шанса панă рольсен характерĕсене уçса пачĕç. Спектакль курма пынă халăх уйрăмах сцена çине Николай Мироновпа Людмила Шишкова тухсан ахăлтатсах кулчĕ, вĕсен комедиллĕ сăнарĕсем шăпах çапла тума хистерĕç те.
А.КАРПОВА.
Источник: "Пирěн пурнăç"