21 октября 2016 г.
Октябрĕн 1-мĕшĕнче кĕрхи призыв пуçланчĕ. Çавна май йăлана кĕнĕ тăрăх районти Культурăпа кану центрĕнче ытларикун Призывник кунĕ иртрĕ. Çак мероприятие призывниксем, вĕсен ашшĕ-амăшĕ, шкулта аслă классенче вĕренекенсем пухăнчĕç. Малтанах районти тĕп библиотекăн вулав залĕнче çавра сĕтел иртрĕ. Етĕрне тата Хĕрлĕ Чутай районĕсен çар комиссариачĕн пай начальникĕ Александр Прокопьев, район прокурорĕ Валерий Шоркин, район администрацийĕн вĕренỹ пайĕн начальникĕ Игорь Живоев тата ыттисем яшсемпе çар пĕлтерĕшĕпе хисепĕ çинчен калаçрĕç, çара кайса килнĕ çамрăк яланах хисепре пулассине, уншăн ĕçе вырнаçас тĕлĕшре çул уçă пулассине палăртрĕç, çамрăксен ыйтăвĕсене хуравларĕç.
"Район ятне ан ярăр"
Районти Культурăпа кану центрĕн сцени çине тухса калаçакансем чылаййăн пулчĕç. Вĕсем пурте Тăван çĕр-шыва хỹтĕлесси кашни арçыннăн тивĕçĕ пулнине палăртрĕç, каччăсене çĕршыв хỹтĕлевçин ятне, район ятне ямасăр салтак тивĕçне чыслăн пурнăçлама ырлăх-сывлăх сунчĕç. Салтака кайса килнисенчен Пĕрремĕш Липовкăри Владимир Храмов тухса калаçрĕ. Çамрăк педагог иртнĕ кĕркунне çартан таврăннă, тỹрех ачасене вĕрентес ĕçе кỹлĕннĕ. Салтак пăтти çисе курнă çын пулас хỹтĕлевçĕсене тĕрĕс те витĕмлĕ сăмахсем каларĕ, вĕсене яшсем ăша хывасса шанас килет.
"Эпир сире кĕтетпĕр"
Амăшĕсен ячĕпе Хĕрлĕ Чутайра пурăнакан Полина Алексеева сăмах илчĕ: "Тăван çĕршыва хỹтĕлесси - сăваплă тивĕç. Акă сисеймесĕрех пирĕн ачасен те çара кайма вăхăт çитрĕ. Сире салтак ятне ỹкермесĕр, чыслă пурнăçлама çирĕп сывлăх, ăнăçу, чăтăмлăх сунатпăр. Эпир сире киле сывă та таса таврăнасса кĕтетпĕр". Александр Прокопьев, кĕрхи призыв çинче чарăнса тăнă май, районти каччăсем салтака октябрĕн 22-мĕшĕнчен тухса кайма тытăннине, тĕпрен илсен, ытларахăшĕ ноябрьте тата декабрь пуçламăшĕнче каяссине пĕлтерчĕ. Призывник кунĕнче 31 каччă алла повестка илчĕ. Вĕсем: Андрей Перепелкин, Виталий Михеев, Алексей Ножиков, Андрей Ярдыванкин, Сергей Алексеев, Валерий Медведев, Игорь Быков, Игорь Пакрушов, Роман Сюткин, Сергей Васюков, Максим Ятманов, Михаил Туйманкин, Дмитрий Бродюков, Дмитрий Ебраев, Николай Фролов, Сергей Кокшейкин, Андрей Белов, Владимир Михайлов, Алексей Егоров, Евгений Перепелкин, Павел Моисеев, Андрей Мокшин, Денис Алеев, Руслан Михуткин, Андрей Сергеев, Семен Михеев, Анатолий Митин, Михаил Меркиташкин, Филипп Тихонов, Дмитрий Жигулев, Андрей Миронов.
"Тупа тăватпăр!"
Салтака кайма хатĕрленекенсен ячĕпе Хĕрлĕ Чутайри Дмитрий Бродюков сăмах илчĕ. "Эпир Раççей Федерацийĕн Хĕç-пăшал вăйĕсенче службăра тăма хатĕрленнĕ май атте-анне, ветерансем тата районта пурăнакансем умĕнче салтак ятне çỹлте тытса пыма, çарта малта пулма, хамăрта хăюлăхпа хастарлăха туптама, чыслăха упрама, Тăван çĕршыва хỹтĕлеме тупа тăватпăр!" - терĕ Дмитрий. Ытти призывниксем те унпа пĕрле тупа турĕç.
Сăмах май, Дима Хĕрлĕ Чутайри пĕтĕмĕшле пĕлỹ паракан вăтам шкултан 2012 çулта вĕренсе тухнă, тăватă çул Шупашкарти право академийĕнче вĕреннĕ, кăçал юрист дипломне алла илнĕ. Районти çар енĕпе ĕçлекен специалист Светлана Сатлайкина пĕлтернĕ тăрăх, Димăн Президент полкне лекес шанчăк пур, вăл районти яшсенчен пĕччен резервра тăрать.
Салтака кайма хатĕрленекенсене Хĕрлĕ Чутайри Турă Хĕресне Çĕкленĕ храмăн настоятелĕ Максим атте те пил сăмахĕ каларĕ, пĕчĕк парнепе хавхалантарчĕ.
Юлашкинчен пулас салтаксем концерт курма пултарчĕç. А.ЗАМУТКИНА.
Источник: "Пирěн пурнăç"