21 октября 2016 г.
Октябрĕн 20-мĕшĕнче районти пур ял тăрăхĕнче те Пĕрлехи информаци кунĕ иртрĕ. Район пуçлăхĕпе Александр Степановпа тĕп хуламăртан килекен информаци ушкăнне ертсе пыракан, Чăваш Республикин культура, национальноçсен ĕçĕсен тата архив ĕçĕн министрĕн çумĕ Вячеслав Оринов Тралькасси ял тăрăхĕнче пурăнакансемпе тĕл пулчĕç.
Райадминистрацин информаци ресурсĕсен секторĕн заведующийĕпе Федор Вахтеровпа Чăваш Республикин информаци политикин министрĕн çумĕ Юлия Стройкова Питĕркасси ял тăрăхĕнче пулчĕç, вырăнти шкул учителĕсемпе тĕл пулчĕç. Пĕрлехи информаци кунĕн тĕп ыйтăвĕсене сỹтсе явнипе пĕрлех тĕрлĕ ыйту тавра та калаçрĕç. Информаци кунĕнче хĕрлĕчутайсен тĕп ыйтăвĕ Наци телевиденине курма май çукки пирки пулнине палăртмалла. Кунсăр пуçне Атнартан тата Питĕркассинчен Хĕрлĕ Чутайри вăтам шкула çỹрекен аслă классенчи ачасем валли шкул автобусĕ кирли пирки те сăмах хускатнă.
Вячеслав Оринов, ЧР культура министрĕн çумĕ:
- Паянхи тĕп ыйтусенчен пĕри - пушар хăрушсăрлăхĕ, çавăнпа та манăн ун пирки уйрăммăн чарăнса тăрас килет. Хĕле кĕрес умĕн газ тата электричество приборĕсене специалистсене тĕрĕслеттерес ыйтăва пысăк тимлĕх уйăр-малла. Çавăн пекех ял тăрăхĕсенчи пĕччен тата кивĕ çуртсенче пурăнакансем патне çитсе лару-тăрупа паллашмалла, вĕсемпе пушар хăрушсăрлăх ыйтăвĕпе ăнлантару ĕçĕ ирттермелле, мĕншĕн тесен чылай чухне вĕсене пула кỹршĕре пурăнакансем те шар кураççĕ. Кун йĕркинчи тепĕр ыйту - пичет кăларăмĕсене çитес çулхи пĕрремĕш çур çул валли çырăнтарасси. Хальхи вăхăтра шăпах çăмăллăхлă хаксемпе çырăнтармалли вунăкунлăх пырать. Юратнă кăларăмсене укçа перекетлесе çырăнса илме май пур. Районти кашни иккĕмĕш çемье юратса вулакан район хаçатне те çырăнса юлмалла, республика хаçачĕсем пирки те манмалла мар.
Источник: "Пирěн пурнăç"