02 ноября 2016 г.
Октябрĕн 28-мĕшĕнче Шупашкарта ЧР Пуçлăхĕ Михаил Игнатьев ялхуçалăх тата тирпейлекен промышленность ĕçченĕсене наградăсем парса чысларĕ. Çак йышра "Коминтерн" ялхуçалăх производство кооперативĕн сĕт комплексĕн начальникĕ Андрей Данилов та пулчĕ. Районта пĕрре мар чи лайăх ферма заведующийĕн ятне çĕнсе илнĕ Андрей Геннадьевич "Чăваш Республикин ялхуçалăхĕн тава тивĕçлĕ ĕçченĕ" хисеплĕ ята тивĕçрĕ.
Андрей Геннадьевич Данилов "Коминтерн" ЯХПК-ра 1990 çулта ĕçлеме пуçланă. Чăваш патшалăх ялхуçалăх институтĕнчен вĕренсе тухнă çамрăк специалиста малтанах Трапай фермин тăваттăмĕш бригадине ертсе пыма шаннă. Çулталăкран хуçалăхăн тĕп зоотехникне куçарнă. 2006 çултан пуçласа паянхи кунччен вăл сĕт комплексĕн начальникĕнче вăй хурать. Выльăх-чĕрлĕх отраслĕнче вăй хунă май вăл выльăх ĕрчетекенсен опычĕпе тĕплĕнрех паллашас тĕллевпе ют çĕршывсенче те пĕрре мар пулса курнă. Унти ĕç технологийĕсене кунта пурнăçа кĕртме тăрăшнă.
Паянхи кун, сăмахран, комплексра ĕçлекенсем сăвăнакан 320 пуç ĕнене Европа технологийĕпе тăрантараççĕ. Çĕнĕ йышши технологие пула продукци илесси самаях ỹснĕ. Кăçалхи тăхăр уйăхра комплексри ĕнесенчен 16 200 центнер (кашни ĕне пуçне 5063 килограмм) сĕт тата 298 пăру илнĕ. Пăрусене комплексра 4 уйăха çитиччен усраççĕ. Халĕ кунта 600 ытла пуç. Вĕсен ỹт хушаслăхĕ 9 уйăхра пĕтĕмпе 509 центнерпа танлашнă, кашни выльăх вăтамран талăкра 755 грамм ỹт хушнă.
Лайăх кăтарту тунинче комплексра ĕçлекенсен, чи малтанах Андрей Геннадьевичăн, тỹпи пысăк. Коллективпа пĕр чĕлхе тупса тăрăшнипе ĕç те ăнса пырать.
А.ЗАМУТКИНА.
Источник: "Пирěн пурнăç"