18 ноября 2016 г.
Клара Александровна Данилова Ачкассинчи почта уйрăмĕнче 1993 çултанпа вăй хурать. Тăрăшуллă хĕрарăм тивĕçлĕ канăва тухнă пулин те ял çыннисене тĕрлĕ хаçат-журналпа тивĕçтерме тăрăшать. Вăл хăй те килрен-киле çỹресе хаçат валеçме ỹркенмест. Клара Александровна мăшăрĕпе Анатолий Александровичпа Пĕрремĕш Липовкăра пурăнать. Почта уйрăмĕн начальникĕн тивĕçĕсене пурнăçлама çăмăл мар пулин те кашни кунах ĕçе васкать, çывăх çыннисене валли те вăхăт тупать.
Ĕçĕ те çăмăл мар, çулĕ те кĕске мар. Çак ĕçре ăна виçĕ почтальон - Галина Александровна Максимова, Галина Анатольевна Кошмаркина тата Надежда Тимофеевна Романова - пулăшать. Вĕсем ял халăхне эрнере тăватă хутчен тĕрлĕ хаçат-журналпа тивĕçтереççĕ, тĕрлĕ продуктсем çитерсе параççĕ. Ачкассинчи почта начальникĕ пĕлтернĕ тăрăх, çак тăрăхра хаçат вулакансем сахал мар. Çырăнакансем хушшинче çамрăксем те йышлă. Паянхи кун унта район тĕкĕрĕ 256 киле çитет. Хаçата ытларах Ачкасси ялĕнче çырăнаççĕ. Харăсах 4-5 хаçат çырăнса тăракан та сахал мар Ачкасси ял тăрăхĕнче. Вĕсем: Валерий Александрович Николаев, Раиса Ильинична Яндайкина, Зинаида Ильинична Яндайкина, Нина Николаевна Ларкина, Юлия Владимировна Васюкова, Людмила Федоровна Артемьева, Ульяна Ивановна Абакумова.
Ырă тĕслĕх кăтартнăшăн, хаçат çырăнакансен хисепне чакарманшăн, ăна хушса пынăшăн, тỹрĕ кăмăлпа ĕçленĕшĕн, ĕçре активлăх кăтартнăшăн Клара Александровна çулсерен Раççей почти кунĕнче тĕрлĕ грамотăсене тивĕçет. Чунĕпе çамрăк, ĕçре пăрчăкан пек вăр-вар пулни плана çулсерен тултарма, хаçат вулакансен йышне ỹстерсе пыма пулăшать.
А.ВАСЮКОВА.
Источник: "Пирěн пурнăç"