23 ноября 2016 г.
Çак кунсенче савăнăçлă хыпар пĕлтĕмĕр: Турхан ялĕнче пурăнакан, "Нива" хуçалăхра ĕçлекен Михаил Зайцева Чăваш Ен Пуçлăхĕн Указĕпе "Чăваш Республикин тава тивĕçлĕ механизаторĕ" хисеплĕ ят панă.
Михаил Ильич шкулта вĕреннĕ çулсенчех, çуллахи каникулсенче, тăван колхоза пулăшма тăрăшнă: выльăх апачĕ хатĕрленĕ, сенаж е силос янтланă çĕре хутшăннă, тислĕк те тасатнă. Шкултан вĕренсе тухсан Етĕрнери 3-мĕш СПТУ-на вĕренме кĕнĕ. Ăна пĕтерсенех "Присурский" совхоза тракториста вырнаçнă май ĕç кун-çулĕ пуçланнă. Çулсем иртнĕ май хуçалăхра улшăнусем пулса иртсен те хăйĕн ĕçĕнчех юлнă.
40 çула яхăн ĕнтĕ Михаил Ильич трактористра тăрăшать. Хуçалăх ертỹлĕхне кашни çулах пысăк кăтартусемпе савăнтарать. 2014 çулта вăл 1800 гектар, иртнĕ çул 2000 условнăй эталон гектар ĕç пурнăçланă. Кăçалхи сакăр уйăхра та 1932 условнăй эталон гектар чухлĕ ĕç тума, 4005 тенкĕлĕх сĕрмелли-çунтармалли материал тата 3895 тенкĕлĕх саппас пайĕ перекетлеме пултарнă. Пысăк опытлă механизатор кашни çулах çурхи, кĕрхи культурăсене акнă, калчасене, нумай çул ỹсекен курăксене апатлантарнă, тыр-пул пухса илнĕ çĕрте вăй хурать. Хăйĕн ĕçне юратса, яваплăха туйса, вăхăтра тата пахалăхлă пурнăçлать. Техникăна юсавлă тытать, ĕç дис-циплинине пăсмасть. Унăн ĕç вырăнĕнче яланах йĕркепе тасалăх хуçаланать.
Михаил Зайцев ĕçри ỹсĕмсемшĕн темиçе хут та район администрацийĕн, ЧР Ялхуçалăх министерствин, Патшалăх Канашĕн, "Единая Россия" партин Хисеп грамотисене тивĕçнĕ. "Чăваш Республикин тава тивĕçлĕ механизаторĕ" хисеплĕ ят вара ăна малашне те ỹсĕмсем тума хавхалантарса тăрасса шанас килет.
А.ДМИТРИЕВА.
Источник: "Пирěн пурнăç"