14 декабря 2016 г.
Çĕнĕ çул уявĕсем çывхарса килеççĕ. Пурин те çак уявсене илемлĕ, капăр, асра юлмалла ирттерес килет. Фейерверксене, петардăсене тата ытти пиротехника изделийĕсене халĕ çăмăллăнах туянма пулать. Анчах çак çутăсене туянакансем хăйсен аллинче хăрушлăх кăларса тăратакан, аркатакан пысăк вăй пулнине манаççĕ. Астăвăр, салютсем илемлĕ кăна мар, вĕсем хăрушă та. Ырă мар, инкеклĕ лару-тăрăва çакланас мар тесен çакна асра тытмалла: петардăсемпе фейерверксене пиро-техника сутма ирĕк пур лавккасенче кăна туянмалла; тавара илнĕ чух ăна хăçан кăларнине, унăн усă курмалли срокне, упаковкине пăхмалла; хатĕр-сене вĕçтериччен инструкцие (вăл вырăсла та пулмалла) вуламалла, хăрушсăрлăх правилисене пăхăнмалла. Ачасем аслисемсĕр пиротехникăпа усă ан курччăр. Шăпах вĕсен пиротехникăпа усă курнăран йывăр сурансем пулаççĕ те. Салютсене ỹсĕрле яни инкек патне çитерме пултарать: куçа амантма, алăсене пĕçертме пулать.
Салют ямалли вырăна малтанах суйламалла. Вăл тỹрĕ, йывăçсем, электричество пралукĕсем тата ытти чăрмавсем çук вырăнта пулмалла. Фейерверка куракансем еннелле тытма кирлĕ мар, ăна çирĕп вырнаçтармалла. Салютсене нимĕнле майпа та алăран кăларса яма юрамасть. Пиротехникăпа усă курнă хыççăн территорие тĕрĕслесе тухмалла, хăрушă элементсенчен тасатмалла. Палăртмалла, пасарсенче сутакан Китайра тунă пиротехника инструкцире палăртнă вăхăт çитмесĕрех сирпĕнме пултарать. Хăшĕ-пĕрисем тата нỹрелнĕ фейерверксене батарейăсем çине хума ăс çитереççĕ. Кун пек тума пач та юрамасть. РФ Правительствин йышăнăвĕпе пиротехникăна халăх пурăнакан çуртсенче, вокзалсенче, обществăлла транспорт хатĕрĕсенче сутма юрамасть. 16 çул тултарман çамрăксене унпа сутă тума чарнă. Пиротехника çине сертификат пулмалла. Çĕнĕ çул фейерверкĕ савăнăç кăна илсе килтĕр тесен ăна пасарсенче, алăран ан туянăр, сутуçăран сертификат ыйтăр, инструкцие тимлĕ вулăр.
Алексей ЯРАБАЕВ, районти пушар асăрхавĕн патшалăх инспекторĕ.
Источник: "Пирěн пурнăç"