16 декабря 2016 г.
Нумаях пулмасть Шупашкарта Чăваш Енри пушарнăйсем пухăнса Пĕтĕм тĕнчери волонтерсен кунне паллă тунă. Савăнăçлă мероприяти Раççей МЧС-ĕн республикăри Тĕп управленийĕнче иртнĕ. Унта Раççей МЧС-ĕн республикăри Тĕп управленийĕн начальникĕ Станислав Антонов генерал-майор доброволецсемпе волонтерсене уявпа саламланă. Çавăн пекех çулăмпа кĕрешекен тăрăшуллă та пуçаруллă çынсене ВДПО Тĕп Канашĕн ведомство наградисене парса чысланă. Наградăна тивĕçнисен йышĕнче Сĕнтĕкçырми ялĕнче пурăнакан Вячеслав Сергеевич Корчагин та пулнă. Вăл пушар хуралĕн обществăлла пĕрлешĕвĕсене йĕркеленĕшĕн, аталантарнăшăн тата çирĕплетнĕшĕн "За содействие в организации добровольной пожарной охраны" ВДПО медальне тивĕçнĕ.
Палăртмалла, Вячеслав Сергеевич Хусанушкăнь ял тăрăхĕн администрацийĕ çумĕнче йĕркеленĕ пушар хуралĕнче 10 çул ытла, вăл мĕн йĕркеленнĕренпех, вăй хурать. Ял тăрăхĕнче е районта инкеклĕ пулăм сиксе тухнине пĕлсенех пулăшма васкать. Хастар чĕреллĕскер общество ĕçĕнчен те юлмасть, кашни мероприятиех активлă хутшăнать.
А.ЗАМУТКИНА.
Источник: "Пирěн пурнăç"