16 декабря 2016 г.
Декабрĕн 13-мĕшĕнче тĕп хуламăрти "Чебоксары-Арена" Пăр керменĕнче пысăк уяв иртрĕ - савăнăçлă лару-тăрура Раççейри Кино тата Чăваш Республикинчи Ĕç çыннин çулталăкĕсене хупрĕç, 2017 çулта Раççейре ирттерме палăртнă Экологи çулталăкне тата Чăваш Енри Амăшĕпе Ашшĕн çулталăкне уçрĕç. Пĕлтерĕшлĕ мероприятие власть органĕсен представителĕсем, обществăлла организацисем, республикăри предприятисемпе учрежденисенче тăрăшакансем, ĕç ветеранĕсем, ĕç династийĕсем, çамрăксем хутшăнчĕç. Республика шайĕнчи уява 30 ытла çынран тăракан район делегацийĕ те хутшăнчĕ, ăна район администрацийĕн пуçлăхĕ Александр Башкиров ертсе пычĕ. Уявра республика Пуçлăхĕ Михаил Игнатьев Кино тата Ĕç çыннин çулталăкĕнче Чăваш Енре нумай ырă ĕç тунине палăртрĕ. "Пирĕн ĕçчен халăх вăрçă хыççăн ырми-канми ĕçлесе çĕршыва ура çине тăратнă, халĕ те чунне парса тăрăшать. Тăван çĕр аталанăвĕпе пуласлăхĕшĕн тăрăшакан ĕç çыннине пирĕн хисеплемелле, çакна çамрăксене те вĕрентмелле", - терĕ Михаил Васильевич.
Чăваш Ен хăни, Раççей халăх артисчĕ Александр Михайлов 2017 çулта пирĕн республикăра Амăшĕпе Ашшĕн çулталăкне паллă тума йышăнса питĕ тĕрĕс тунине каларĕ. "Любовь и голуби", "Мужики!" тата ытти фильмсенче тĕп рольсене калăпланă паллă киноактер пуçтарăннă халăха сăвăсем каласа тата юрласа савăнтарчĕ. Пирĕн республикăри хĕрарăмсен пĕрлешĕвĕн ертỹçи Ольга Зайцева тата Ашшĕсен юхăмĕн председателĕ Владимир Викторов çитес çул çемье хакне ỹстерме май паракан мероприятисем тата нумайрах пулассине палăртрĕç. Çавăн пекех пухăннисене республикăри халăхсен Ассамблейин председателĕ Лев Кураков тата Чăваш Наци конгресĕн Президенчĕ Николай Угаслов саламларĕç. Уява килнĕ пин-пин çынна республикăри паллă артистсемпе пултарулăх ушкăнĕсем савăнтарчĕç. Юлашкинчен вара Шупашкара ятарласа килнĕ, Раççейĕпех паллă "Премьер-министр" эстрада ушкăнĕн юррисемпе киленме май пулчĕ.
А.КАРПОВА.
Источник: "Пирěн пурнăç"