21 декабря 2016 г.
Хĕрлĕ Чутай шкулĕн спортсменĕсем - чемпионсем Çак кунсенче "Хастар" физкультурăпа спорт комплексĕнче Чăваш Республикинчи шкул ачисен волейбол лигин районти тапхăрĕ иртнĕ. Хĕрсемпе каччăсен командисем ЧР Патшалăх Канашĕн депутачĕн Валерий Павловăн парнисене çĕнсе илессишĕн ăмăртнă.
Декабрĕн 10-мĕшĕнче хĕрсем хушшинче иртнĕ вăйăсенче Ираида Родионова тренер-преподаватель ертсе пыракан Хĕрлĕ Чутай шкулĕн волейбол команди пĕрремĕш вырăна тухнă. Шкул чысне волейбол площадкинче Елена Афанасьева (команда капитанĕ), Аделина Григорьева, Валерия Парфенова, Светлана Пахинова, Диана Михопарова, Валерия Васильева, Софья Куликова тата Ксения Илдушкина тивĕçлĕн хỹтĕленĕ. Иккĕмĕш вырăна Мăн Этмен шкулĕн команди тухнă (тренерĕ - Владимир Кукушкин), виççĕмĕшне - Çĕн Атикасси шкулĕн команди (тренерĕ - Светлана Петрейкина).
Декабрĕн 17-мĕшĕнче вара каччăсем ăмăртнă. Ку хутĕнче те пурне те хыçала хăварса Хĕрлĕ Чутай шкулĕн команди мала тухнă. Николай Судаков тренер ертсе пынипе Олег Ягункин (команда капитанĕ), Константин Титилкин, Алексей Дадюков, Константин Секайкин, Дмитрий Козлов, Максим Ербулаткин тата Евгений Васильев аван вылянă. Иккĕмĕш вырăна Атнар шкулĕн команди тухнă (тренерĕсем - Николай Судаковпа Иван Иванов), виççĕмĕш вырăна мăнэтменсем йышăннă (тренерĕ - Владимир Кукушкин).
Мала тухнă командăсене савăнăçлă лару-тăрура Валерий Павлов депутат тата район ертỹçисем саламланă, çамрăк спортсменсене грамотăсемпе медальсем, парнесем парса чысланă. Районти чи вăйлă командăсем çитес çулхи февральте шкул ачисен волейбол лигин республикăри ăмăртăвĕсене хутшăнĕç.
А.КАРПОВА.
Источник: "Пирěн пурнăç"