21 декабря 2016 г.
Çĕнĕ Лапсарта ỹснĕ чăваш спортсменки Татьяна Акимова декабрĕн 15-мĕшĕнче Чехире биатлон енĕпе иртнĕ тĕнче Кубокĕнче чи вăйлă биатлонистсене çĕнтерсе пурне те тĕлĕнтерчĕ.
Юлашки çулсенче Раççей биатлонисткисене тĕнче ăмăртăвĕсенче питех ăнмарĕ. Кăçал та ку таранччен пирĕн хĕрсем медальлĕ пулаймарĕç.
Татьяна Акимова çĕнтерĕвĕ вара çĕнĕ шанăç çуратрĕ. Биатлонăн чăваш шкулĕнче ăсталăхне туптанă Татьяна Акимова спринтра кашни рубежрах тĕл персе 7,5 километра 21 минут та 58,9 çеккунтра чупса тухса ылтăн медале тивĕçни - çĕршывшăн та, чăваш спорчĕшĕн те историллĕ пулăм.
Декабрĕн 17-мĕшĕнче вара 26 çулхи Татьяна хĕрарăмсен пасьютĕнче виççĕмĕш вырăна тухма пултарнă. Татьяна хăй пĕрремĕш тухнине ĕненсех те кайманнине пĕлтернĕ, кун пек пуласса кĕтмен иккен вăл. Тĕнче Кубокĕнче тỹрех икĕ медаль çĕнсе илме пултарнă чăваш спортсменки малашне хăйне татах ăнасса шанать.
Алексей НИКИТИН, райадминистрацин физкультурăпа спорт тата çамрăксен политикин секторĕн заведующийĕ:
- Татьяна Акимована республикăри ăмăртусене хутшăннине курма тỹр килнĕ мана. Унăн хĕр чухнехи хушамачĕ Семенова пулнине, вăл Çĕнĕ Лапсарта йĕлтĕр базинчен инçех те мар пурăннине пĕлетĕп. Манăн спортсменкăн хăйĕн тата унăн тренерĕн Анатолий Акимовăн (вăл - Татьянăн хуняшшĕ) ĕçне пысăк хак парас килет. Эпир, хĕрлĕчутайсем, республикăра пурăнакан ытти çынсемпе танах чăваш хĕрĕ çавăн пек пысăк ăмăртусенче ылтăн тата бронза медальсене çĕнсе илме пултарнăшăн чунтанах савăнатпăр, мухтанатпăр. Татьяна Акимован биат-лонри çитĕнĕвĕ çитĕнекен ăрушăн, çамрăк спортсменсемшĕн ырă тĕслĕх пуласса шанатăп.
Источник: "Пирěн пурнăç"