21 декабря 2016 г.
Декабрĕн 16-мĕшĕнче "Хастар" ФСК-ра шкул ачисем ишессипе тупăшнă. Ăмăртусене Хĕрлĕ Чутай шкулĕ 195 çул тултарнине халалланă. Бассейнри ăмăртусем кăçалхи чи вăйлă ишевçĕсене палăртнă. Вĕсем пурте Хĕрлĕ Чутай шкулĕнче вĕренеççĕ: Константин Фондеркин (темиçе хутчен те район рекордсменĕ пулнă), Юрий Тимофеев (эстафетăпа ишессипе темиçе хутчен те район рекордсменĕ, кăçалхи сентябрьте Анапăра иртнĕ Раççей шайĕнчи смотрта яшсем хушшинче иккĕмĕш вырăн йышăннă), Евгения Герасимова (район рекордсменĕ, Анапăра иртнĕ Раççей шайĕнчи смотрта хĕрсем хушшинче иккĕмĕш вырăн йышăннă).
Çавăн пекех "Спортивная смена" номинацире Егор Секайкин палăрнă, кăçал вăл Чăваш Ен первенствине хутшăнса виççĕмĕш спорт разрядне пурнăçланă. Палăртмалла, ишес ăсталăха ачасем Юрий Иванович Столяров тренер-преподаватель тата Эдуард Васильевич Романов физкультура учителĕ патĕнче туптаççĕ.
Сăмах май, çак кунсенче районта республикăри ОБЖ учителĕсен стажировки иртнĕ. Вĕренỹ институчĕ йĕркеленипе 20 яхăн педагог Хĕрлĕ Чутай шкулĕнче Эдуард Романов 11 К класра ирттернĕ ОБЖ-па физкультурăн пĕрлештернĕ урокне çитсе курнă. Çавăн пекех Эдуард Васильевич пульăпа перессипе мастер-класс кăтартнă. Унтан пухăннисем çавра сĕтел хушшинче ачасене пысăк шайри ăмăртусене хатĕрлесси тата патриотизмла воспитани парасси пирки калаçнă.
А.КАРПОВА.
Источник: "Пирěн пурнăç"