23 декабря 2016 г.
Ĕнер, декабрĕн 22-мĕшĕнче, Чăваш Республикин Информаци политикин тата массăллă коммуникацисен министерстви йĕркеленипе Хĕрлĕ Чутай районĕнче Тĕп редактор кунĕ иртрĕ. Республикăра тата районсемпе хуласенче тухса тăракан хаçат-журналсен тĕп редакторĕсем уйăхсерен пĕрле пухăнса тĕрлĕ ыйтăва сỹтсе яваççĕ. Ку хутĕнче калем ăстисем Хĕрлĕ Чутайра пухăнма шутларĕç. 2016 çулта туса ирттернĕ ĕçсене пĕтĕмлетрĕç, çитес çул кăтартуллăрах ĕçлес тесен мĕн-мĕн тумаллине палăртрĕç.
Тĕп редактор кунне ЧР информаци политикин министрĕ Александр Иванов ертсе пычĕ. "Пирĕн пурнăç" хаçатăн тĕп редакторĕ Алина Оринова кĕскен хаçат историйĕпе паллаштарчĕ, редакци кăçал та тупăш тата тираж планне тултарнине пĕлтерчĕ. Алина Николаевна ĕçтешĕсен ыйтăвĕсене хуравларĕ, ĕçре пухнă хăйĕн пуян опычĕпе паллаштарчĕ. "Пирĕн пурнăç" хаçата хĕрлĕчутайсем юратса вулаççĕ, çакна юлашки çулсенче хаçатăн тиражĕ ỹссе пыни çирĕплетет. Районта пурăнакансен шучĕпе илсен, пирĕн хаçата кашни иккĕмĕш çемье вулать теме пулать.
Хамăр корр.
Источник: "Пирěн пурнăç"