18 января 2017 г.
Хальхи вăхăтра Чăваш Енри çамрăксем, çĕршыври пекех, Пĕтĕм тĕнчери Çамрăксемпе студентсен 19-мĕш фестивальне хутшăнма хатĕрленеççĕ. Фестивалĕн тĕп мероприятийĕсем кăçалхи октябрĕн 14-22-мĕшĕсенче Сочири Олимп паркĕнче иртмелле. Çак пысăк та пĕлтерĕшлĕ пулăма 150 çĕршыври 20 пине яхăн çамрăкпа студент пухăнĕ.
Фестиваль тĕллевĕ - пĕтĕм тĕнчери çамрăксен пĕрлешĕвĕсене тĕрĕслĕхпе чăнлăх шухăшĕ тавра пĕрлештересси, халăхсем хушшинчи çыхăнусемпе хутшăнусене çирĕплетесси, аталантарасси.
Республика делегацине фестивале хутшăнма хатĕрлес енĕпе регионти ко-митетне йĕркеленĕ. Ăна ЧР вĕренỹ тата çамрăксен политикин министрĕ Юрий Исаев ертсе пырать. Ку таранччен регионти комитет темиçе лару та ирттернĕ. Республикăран фестивале 125 çын хутшăнĕ. Кандидатсене суйласси икĕ тапхăрпа иртет, вĕсемпе куçăмсăр тата куçăмлă майпа калаçу йĕркелеççĕ. Кандидатсене регистрацилеме пуçланă ĕнтĕ.
Сăмах май, паянхи кун республикăра 14 çултан пуçласа 30 çула çитнĕ 45 пин çамрăк пурăнать. Вĕсене ăнăçлă вĕренме, аталанма, ĕçлеме тивĕçлĕ майсем туса панине палăртмалла.
А.ЗАМУТКИНА.
Источник: "Пирěн пурнăç"