20 января 2017 г.
Иртнĕ эрнере районти "Хастар" физкультурăпа спорт комплексĕнче ирĕклĕ майпа кĕрешекенсен республикăри III уçă турнирĕ иртнĕ. Ăна РФ пĕтĕмĕшле вĕрентĕвĕн хисеплĕ ĕçченне Ю.Шереметьева асăнса ирттернĕ. Турнира Чăваш Енри хуласемпе районсенчи 9, Ульяновск облаçĕпе Мордва Республикинчи 2 команда хутшăннă. Пĕтĕмпе кĕрешекенсен кавирĕ çине 178 çамрăк атлет тухнă, вĕсем хăйсен ỹсĕмĕнчи 5 ушкăнра тата 13 виçев категорийĕнче тупăшнă.
Çĕнтерỹçĕсем йышĕнче хĕрлĕчутайсем те пурри савăнтарать. 2007 çулта çуралнă арçын ачасем хушшинче Вадим Иванов иккĕмĕш вырăна тивĕçнĕ. 2003-2004 çулсенче çуралнисем хушшинче хăйсен виçев категорийĕсенче Данил Федоров пĕрремĕш, Егор Васильев иккĕмĕш пулнă. 2000-2002 çулсенче çуралнă çамрăксем хушшинче Илья Андреев тата Александр Николаев çĕнтерỹçĕ ятне тивĕçнĕ. Виталий Сидуковпа Стас Волков - иккĕмĕшсем, Никита Кутузов - виççĕмĕш. Çĕнтерỹçĕсен тата призерсен йышне кĕнĕ çамрăксем грамотăсене, медальсене тата укçан хавхалантарăва тивĕçнĕ. Чи лайăх кĕрешỹçĕсене кубоксем панă. Спорт уявне килнĕ хăнасемпе турнира хутшăннă çамрăксем ăмăртусемпе кăмăллă юлнă.
А.АЛЕКСЕЕВА.
Источник: "Пирěн пурнăç"