25 января 2017 г.
Январĕн 20-мĕшĕнче Чăваш наци конгресĕн районти уйрăмĕн черетлĕ ларăвĕ иртрĕ, ăна Юлия Мареева ертсе пычĕ. Юлия Петровна ЧНК-н районти уйрăмĕ йĕркеленипе кăçал март уйăхĕнче "Шкул пики" конкурс, кĕркунне вара Амăшĕпе Ашшĕн çулталăкне халалласа "Пултаруллă аттепе анне" конкурс ирттерме палăртнине пĕлтерчĕ.
Кăçал республикăра "Чăваш халăх тумĕ - халăхăмăрăн культура пуянлăхĕ" конкурс иртет, ăна Чăваш наци конгресĕ тĕрлĕ министерствăсемпе пĕрле йĕркелет. Малтанласа конкурсăн тапхăрĕсем районсенче иртеççĕ. Пирĕн районта вăл февралĕн 21-мĕшĕнче пулĕ. Унта кăмăл тăвакансем пурте хутшăнма пултараççĕ. Конкурс курав евĕр иртет, ăна районти Культура çуртĕнче йĕркелеççĕ. Конкурс-курава ĕлĕкхи чăваш кĕпе-саппунне, сурпансене, масмаксене, хĕрес çаккисене илсе тухма пулать. Унтах чăваш тĕррине те, шăрçасенчен тунă капăрлăхĕсене те хаклĕç. Шупашкартан килсе çитнĕ жюри конкурса тăратнă япаласене 5 номинаципе хак парĕ, çĕнтерỹçĕсем республикăри тапхăра хутшăнĕç.
Палăртса хăвармалла, Чăваш наци конгресĕн районти уйрăмĕ шкулсемпе тата ача сачĕсемпе тачă çыхăнса ĕçлет. Çавăнпа та ларăва Марина Николаевна Васильева ертсе пынипе Хĕрлĕ Чутайри вăтам шкулта вĕренекенсем те хутшăнчĕç. Ачасем Петĕр Хусанкай 110 çул тултарнине халалланă литература каçне йĕркелерĕç, пухăннисене поэтăн сăввисене вуласа, унăн сăввисем тăрăх çырнă юрăсене юрласа пачĕç.
А.КАРПОВА.
Источник: "Пирěн пурнăç"