17 февраля 2017 г.
Йăлана кĕнĕ тăрăх уйăхсерен пулакан Пĕрлехи информаци кунĕ иртрĕ февралĕн 15-мĕшĕнче. Пирĕн района Шупашкартан ЧР культура министрĕн çумĕ Вячеслав Оринов ертсе пыракан ушкăн килсе çитрĕ. Информаци кунне килнисем ушкăнсем çине пайланса ял тăрăхĕсене, предприяти-организацисене çитрĕç.
Вячеслав Оринов Ачкасси ял тăрăхĕнче пурăнакансемпе тĕл пулчĕ. Информаци кунĕн тĕп темисене сỹтсе явнипе пĕрлех кунта халăх кăçал Шулю клубне тума пуçлассишĕн савăннине палăртрĕ. Район пуçлăхĕ Александр Степанов ертсе пыракан ушкăн Мăн Этмен шкулĕн коллективĕпе тĕл пулса калаçрĕ. Александр Юрьевич республика Пуçлăхĕн Михаил Игнатьевăн Патшалăх Канашне янă Çырăвĕ çинче тĕплĕн чарăнса тăчĕ. Мăнэтменсемпе тĕл пулăва пынă Пенси фончĕн районти уйрăмĕн специалисчĕ Марина Ямскова пенсисемпе çыхăннă ыйтусем çине хуравларĕ.
Райадминистраци пуçлăхĕ Александр Башкиров "Хастар" физкультурăпа спорт комплексĕн коллективĕпе тата Хĕрлĕ Чутай ял тăрăхĕнче пурăнакансемпе тĕл пулса калаçрĕ. Унтан вăл воин-интернационалистсемпе тĕл пулчĕ, "Афганистан ветеранĕсен Раççейри союзĕ" обществăлла организацин районти уйрăмне граждансене патриотизмла вос-питани парас енĕпе аван ĕçленĕшĕн Тав çырăвĕ парса чысларĕ.
Информаци кунĕнче çынсем хăйсене пăшăрхантаракан чылай ыйтăва пама пултарчĕç. Пурне те ытларах çулсене юртан вăхăтра тасатса тăманни пăшăрхантарни палăрчĕ. Тĕслĕхрен, çакăн пек ыйту Упукушкăнче, Çĕн Ирчемесре тата Тралькасси ял тăрăхĕнче пурăнакансенчен пулчĕ. Унсăр пуçне шкулти спортзалсене çамрăксене каçхи вăхăтра çỹреме майсем туса парасси пирки те калаçрĕç. Юлашкинчен информушкăн членĕсем район центрĕнчи Çĕнтерỹ лапамĕнче пухăнчĕç, воин-интернационалистсене асăнса лартнă палăк умне чечек кăшăлĕ хучĕç.
А.ОРИНОВА.
Источник: "Пирěн пурнăç"