22 февраля 2017 г.
Пĕтĕм Раççейри VIII ялти хĕллехи спорт вăййисен республикăри тапхăрĕ районта февралĕн 17-18-мĕшĕсенче иртрĕ. Çавна май пирĕн района республикăри муниципаллă тытăмсен 21 пĕрлештернĕ команди, ял тăрăхĕсенче пурăнакан, ялхуçалăхĕнче вăй хуракан 500 яхăн çын килсе çитрĕç. Районти волонтерсем спортсменсене тивĕçлĕ кĕтсе илчĕç.
Спорт вăййисем савăнăçлă лару-тăрура уçăлчĕç. Ăна уçнă çĕре ЧР физкультурăпа спорт министрĕ Сергей Шелтуков, ЧР Патшалăх Канашĕн Председателĕн çумĕ Николай Малов, ЧР культура, национальность тата архив ĕçĕсен министрĕн çумĕ Вячеслав Оринов, район пуçлăхĕ Александр Степанов тата район администрацийĕн пуçлăхĕ Александр Башкиров хутшăнчĕç.
Район пуçлăхĕ Александр Степанов хăйĕн сăмахĕнче çакăн евĕр пысăк мероприятине пирĕн района ирттерме шаннăшăн спорт министерствине тав турĕ, кунта пухăннă республикăри чи вăйлă спортсменсене ăнăçу сунчĕ. Мероприятие пухăннисене районти спорт уйрăмĕсене çỹрекенсем хăйсен пултарулăхĕпе паллаштарчĕç.
Кăнтăрла çитеспе ăмăртусем пуçланчĕç, кире пуканне çĕклекенсем, шашистсем, шахматистсем, йĕлтĕрпе чупакансем тупăшрĕç, полиатлонистсем, механизаторсем, доярсем тата çемьесем нумай енлĕ ăмăртура вăйĕсене виçрĕç. Спорт ăмăртăвĕсем тỹрех темиçе çĕрте - физкультурăпа спорт комплексĕнче, Хĕрлĕ Чутайри вăтам шкулта, районти Культурăпа кану центрĕнче, пасар площадĕнче, Ишеккасси çывăхĕнчи "Чавал" уçланкăри йĕлтĕр çулĕ çинче иртрĕç.
Икĕ кун хушши тупăшнă хыççăн чи вăйлă команда ятне йĕпреçсем çĕнсе илчĕç (2276 очко), иккĕмĕш вырăнта - Вăрнар районĕ (9232 очко), виççĕмĕш вырăнта - Шупашкар районĕ (2128 очко), хĕрлĕчутайсем (2112 очко) тăваттăмĕш вырăн йышăнчĕç. Калас пулать, хĕрлĕчутайсем ялти спорт вăййисене активлă хутшăнчĕç. Вĕсем доярсен, кире пуканĕ йăтакансен ăмăртăвĕсенче, полиатлон енĕпе виççĕмĕш пулчĕç. Çак ăмăртусенче Леонид Ярадов, Николай Борисов, Михаил Прокопьев, Юрий Степанов, Алексей Дадюков, Анастасия Осеева, Арина Васькина, Надежда Соколова, Валентина Кондратьева, Иван Михопаров, Алина Мокеева, Екатерина Гаврилова хастар пулнине палăртмалла.
Пирĕннисем ытти спорт тупăшăвĕсене те активлă хутшăнчĕç. Сăмахран, шашка тата шахмат турнирĕсенче Николай Сергеев вĕрентекен, Урикассинче пурăнакан Леонид Петров, Хĕрлĕ Чутайри Александр Альгешкин монтер, Ирина Чубайкина врач-педиатр, Юрий Пахинов шутлав палатин председателĕ, Мучикассипе Тралькасси ялĕсенчи Римма Ерофеевапа Леонид Еремеев хастар пулчĕç. Йĕлтĕрçĕсен масс-стартĕнче районти паллă спортсменсем Алевтина Дадюкова, Галина Волкова, Владимир Михуткин, Игнат Смирнов чупрĕç. Механизаторсен ăмăртăвĕнче Сергей Кчетковпа Иван Сатлайкин тупăшрĕç.
Спорт çемйисем хушшинче (10-11 çулхи хĕрачапа) Мучикассинчи Мурайкинсен çемйи пĕрремĕш, 12-13 çулхи хĕрачаллă çемьесем хушшинче Калкассинчи Алексеевсем иккĕмĕш вырăн çĕнсе илчĕç. Çĕнтерỹçĕсемпе призерсем дипломсене, медальсене тивĕçрĕç.
Чи вăйлă командăсем мартăн 2-6-мĕшĕсенче Чăваш Ен чысне Новосибирск облаçĕнчи Бердск хулинче хỹтĕлĕç. А.ЗАМУТКИНА.
Источник: "Пирěн пурнăç"