01 марта 2017 г.
Кăçал хĕле иртерех, февралĕн 24-мĕшĕнче, ăсатрăмăр. Район центрĕнче янăракан юрă-кĕвĕ, çỹçеллĕ тутăр çыхнă, сăхман, пустав тăхăннă Чутай хĕрĕсем, ватти-вĕтти, тĕрлĕ тĕслĕ хăюсемпе илемлетнĕ лашасемпе хыçлă çунасем тата тĕрлĕ техника уяв сумне хăпартрĕç. Хĕл ăсатăвне пухăннă район çыннисене тата хăнасене район пуçлăхĕ Александр Степанов, райадминистраци пуçлăхĕ Александр Башкиров, ЧР культура министрĕн çумĕ Вячеслав Оринов, Чăваш Патшалăх Канашĕн депутачĕ Валерий Павлов, Хĕрлĕ Чутай районĕн "Чавал" ентешлĕхĕн председателĕ Александр Самылкин саламларĕç, пурне те çирĕп сывлăх, телей тата ăнăçу сунчĕç. Унтан районти Клубсен пĕрлештернĕ тытăмĕнче тăрăшакансем хĕл ăсатăвне халалласа театрализациленĕ кăтарту пуçларĕç. Çавăн пекех уява пухăннисене ял тăрăхĕсен пултарулăх коллективĕсем юрă-ташăпа савăнтарчĕç. Уяв концерчĕн пĕтĕмлетĕвĕсем тăрăх "Чи лайăх пултарулăх ушкăнĕ" номинацире Пантьăк, Хĕрлĕ Чутай, Кив Атикасси, Штанаш тата Хусанушкăнь ял тăрă хĕсен коллективĕсем палăрчĕç. Жуковсен çемйи "Чи лайăх çунашка" конкурсра çĕнтерчĕ. Кĕçех район центрĕн тĕп урамĕпе ял тăрăхĕсенчен килсе çитнĕ капăр лашасемпе лавсем, автомобильсем, тĕрлĕ техника иртрĕç. Хыçлă çунасем çинче ларса пыракансем хушшинче тĕрлĕ сăнарсене, ĕççыннисене кур ма май пулчĕ. Вĕсем купăс çеммипе хаваслă юрă шăрантарчĕç. Кỹлнĕ лашасен конкурсне кăçал районти пур ял тăрăхĕ те хутшăнчĕ. Уйрăмах вăрман леш енче пурăнакансем вăрăм çула такăрлатса уява килни тỹрех куçа курăнчĕ. Асăннă конкурсра атнарсем мала тухрĕç, ачкассисем - иккĕмĕш, тралькассисем - виççĕмĕш. Конкурса йĕркелекенсем кăçал та Хĕл ăсатăвне кỹлнĕ лашасемпе тухнисене пурне те парнесемпе хавхалантарчĕç. Тройкăсем пулманни кăна пăшăрхантарать. Уявра кашниех хăйне валли киленỹ тупрĕ. Спортпа туслисем тĕрлĕ ăмăртусенче тупăшрĕç: турник çинче туртăнчĕç, шăчă тăрăх хăпарчĕç. 12 метрлă шăчă тăрăх хăпаракансем хушшинче Туктамăш ялĕнче пурăнакан Роман Торейкина çитекенни пулмарĕ. Çак ялти Алексей Окайкин вара турник çинче 32 хутчен туртăнма пултарчĕ. Тури Çĕрпỹкассинче çуралса ỹснĕ Михаил Прокопьев спортăн икĕ тĕсĕнче палăрчĕ. Армспорт енĕпе Кив Атикассинче пурăнакан Анатолий Тиверкин çĕнтерчĕ. Мини-футбол турнирĕнче район центрĕн команди мала тухрĕ. Туктамăш ялĕн çамрăкĕсем канат туртассипе палăрчĕç. Аслисемпе ачасем сцена çинчи пултарулăх ушкăнĕсене курса савăнчĕç.
Источник: "Пирěн пурнăç"