03 марта 2017 г.
Чăвашпотребсоюз Канашĕ çулсерен хăйсен предприятийĕ-семпе лавккисем хушшинче тĕрлĕ конкурссем ирттерет. Çак кунсенче вĕсене пĕтĕмлетнĕ. Палăртма кăмăллă, пирĕн райпо тытăмĕ хăйĕн ĕç-хĕлĕпе "Харпăр хăй хушма хуçалăхĕсемпе ĕçлекен чи лайăх потребительсен обществи", "Ялхуçалăх продукцине чи нумай паракан" тата "Чи лайăх лавкка - йышăнупа хатĕрлев пункчĕ" конкурссенче палăрнă.
2016 çул кăтартăвĕсемпе уйрăм çынсен хушма хуçалăхĕсемпе активлă ĕçленĕшĕн Хĕрлĕ Чутай райповĕ иккĕмĕш вырăн йышăннă. Пĕлтĕр Чăвашпотребсоюз тытăмне кĕрекен 750 суту-илỹ предприятийĕ, çав шутра хĕрлĕчутайсем те, халăхран ялхуçалăх таварне пуçтарнă. Хатĕрлев çаврăнăшне 4 млн та 150 пин тенкĕлĕх тунăран Ишеккасси лавкки "Чи лайăх лавкка - йышăнупа хатĕрлев пункчĕ" конкурсра мала тухнă.
Паянхи кун Ишеккасси лавккинче икĕ çын тăрăшать: Светлана Николаевна Манилова заведующи тата Алина Вячес-лавовна Мерескина сутуçă. Вĕсем Ишеккассипе Тумликасси ялĕ сенче пурăнакансене тĕрлĕ таварпа тивĕçтереççĕ, çав хушăрах халăхран ялхуçалăх продукцине йышăнаççĕ. Палăртмалла, Светлана Манилова Ишеккасси лавккинче 1985 çултанпа ĕçлет. Чылай вăхăт хушши сутуçăра тимлесе вăл ял çыннисем хушшинче ырă ята тивĕçнĕ. Пĕлтĕрхи октябрь уйăхĕнчен пуçласа Светлана Николаевна лавкка заведующийĕнче тимлет.
Сăмах май, унччен нумай çул хушши Ишеккасси лавккин заведующийĕнче Галина Аврамовна Тверскова тăрăшрĕ, халĕ вăл тивĕçлĕ канура. Ишеккасси лавккинче тăрăшакансем тăтăшах тĕрлĕ конкурссене хутшăнаççĕ. Акă пĕлтĕр вĕсем райпо тытăмĕнчи лавккасем хушшинче Çĕнĕ çула хатĕрленсе ирттернĕ конкурса хутшăннă, виççĕмĕш вырăн йышăннă.
А.КАРПОВА.
Источник: "Пирěн пурнăç"