03 марта 2017 г.
Çирĕм пĕрремĕш ĕмĕре информаци технологийĕсен вăхăчĕ тетпĕр пулин те паянхи кун çынсем хаçат-журнал вулама пăрахман-ха, апла-тăк ялсенче почтальонсем кирлех. Районти почта уйрăмĕсенче ĕçлекенсем пурте ырă сăмаха тивĕç, вĕсен ĕçĕ пĕрре те çăмăл марри каламасăрах паллă.
Пирĕн вара район хаçатне аван çырăнтарнăшăн Утаркассинчи почта уйрăмĕнче тимле-кенсене тав сăмахĕ калас килет, вĕсем кăтартусене чакармасăр ĕçлесе пыраççĕ. Утаркассинчи почта уйрăмне паянхи кун Вера Николаевна Федорова ертсе пырать. Ĕçри çитĕнĕвĕсене кура вăл тăтăшах тĕрлĕ шайри наградăсене тивĕçет. Пĕлтĕр, акă, ăна "Раççей почти" ФПУП-ăн Хисеп грамотине парса чысларĕç. В
ера Николаевна ертсе пынипе почта уйрăмĕнче тăватă почтальон вăй хурать. Валентина Николаевна Микушкина Утаркасси ялĕпе тимлет, вăл - пысăк опытлă почтальон. Инна Ильинична Захарова пилĕк-ултă çула яхăн ĕнтĕ Шулю ялĕнче пурăнакансене çĕнĕ хыпарсемпе паллаштарать, пенси укçи валеçет.
Пĕрремĕш Липовкăра пурăнакансемпе çулталăк ытла Римма Дмитриевна Жидкова почтальон ĕçлет. Марина Геннадьевна Козлова вара çур çул каялла Мишеркасси ялĕнче хаçат-журнал валеçме пуçланă. Сăнỹкерчĕкре çавăн пекех нумай çул почтăра ĕçлесе тивĕçлĕ канăва тухнă Зоя Петровна Трифонована куратпăр. Ытти хаçатсемпе пĕрлех район хаçатне те çынсем хушшинче сарассишĕн ырми-канми тăрăшакан маттур хĕрарăм-почтальонсене çурхи уяв ячĕпе саламлатпăр, ырлăх-сывлăх, ĕçре ăнăçу сунатпăр.
А.КАРПОВА.
Источник: "Пирěн пурнăç"