10 марта 2017 г.
Çĕн Атикассинчи вăтам шкулта ачасене спорта явăçтарас тĕлĕшпе тĕллевлĕ ĕçлесе пыраççĕ. Кунти вĕренекенсене тĕрлĕ спорт тĕсĕсене алла илме пулăшаканни - Светлана Петрейкина педагог. Вăл тăрăшнипе ачасем тĕрлĕ шайри ăмăртусенче палăраççĕ.
Çак шкулти спортпа туслă вĕренекенсенчен пĕри - 10-мĕш класра пĕлỹ илекен Анастасия Семенова. Вăл ытларах çăмăл атлетикăна кăмăллать. Хăвăрт чупса район, республика тата çĕршыв шайĕнчи ăмăртусенче пĕрре кăна мар палăрнă Настя. 2013 çулта Çĕн Атикасси шкулĕн команди Анапа хулинче иртнĕ "Президент ăмăртăвĕсенчен" çĕнтерỹпе таврăннине пурте астăватпăр. Анастасия Семенова та çав команда йышĕнче пулнă. Ун чухне Настя чылай ăмăртура палăрнă, спортăн нумай енлĕ ăмăртăвĕсенче вара 1-мĕш вырăна тухнă.
Йĕлтĕрпе те аван чупать Настя, тăтăшах тĕрлĕ ăмăртусене хутшăнса малти вырăнсене йышăнать.
Шкул командипе "Зарница" тата "Орленок" вăйăсен республикăри тапхăрне те хутшăнать. Маттур хĕрупраç пур предметпа та аван ĕлкĕрсе пырать, физкультура урокĕсене вара ытларах кăмăллать. Иртнĕ вĕренỹ çулĕнче вăл физкультурăпа республика шайĕнчи олимпиадăн призерĕ пулнă.
Пĕлтĕрех хĕллехи полиатлон енĕпе Чăваш Республикин чемпионатĕнче çĕнтернĕ.
Сăпайлă та пултаруллă хĕр класра ыттисемшĕн ырă тĕслĕх пулса тăрать. Ахальтен мар пулĕ вăл кăçал Республика Пуçлăхĕн Михаил Игнатьевăн ятран паракан стипендине илсе тăрать. Çамрăк спортсменка малашне те тăван шкул, район чысне çỹле çĕклесе ăнăçу çулĕпе утасса шанатпăр.
А.КАРПОВА.
Источник: "Пирěн пурнăç"