17 марта 2017 г.
Чăваш Патшалăх Канашĕн депутачĕ, Чăвашпотребсоюз председателĕ Валерий Павлов тăрăшнипе çулсерен потребительсен кооперацийĕн тытăмĕнче тăрăшакансен спартакиади иртет. Кăçал та вăл нумаях пулмасть пуçланчĕ. Хальхинче XV спартакиадăна Чăваш Республикинче иртекен Амăшĕпе Ашшĕн çулталăкне халалланă. Акă волейбол выляс, пневматикăллă винтовкăран перес, дартс, йĕлтĕрпе чупас ăмăртусем иртнĕ те ĕнтĕ. Шашкăлла выляс енĕпе вара ку тытăмра ĕçлекенсем апрель уйăхĕнче тупăшĕç. Палăртмасăр иртме çук, асăннă спартакиадăна савăнăçлă лару-тăрура уçнă чухне потребительсен кооперацийĕнче физкультурăна тата спорта аталантарнă çĕре пысăк тỹпе хывнăшăн райпо Канашĕн ертỹçине Александр Степанова республикăри потребительсен обществинче ĕçлекенсен профсоюзĕн Хисеп грамотипе наградăланă. Тĕрлĕ енлĕ ăмăртусенче ыттисемпе танах хĕрлĕчутайсем те хастар тупăшнă. Вĕсем йĕлтĕрпе чупас енĕпе палăрнă. Кăçал виçĕ арçынран тата икĕ хĕрарăмран тăракан 21 команда йĕлтĕр сырса ăмăртма кăмăл тунă. Вĕсен пурин те 2 километрлă дистанцие парăнтарма тивнĕ. Пĕтĕмлетỹсем тăрăх, Хĕрлĕ Чутай райповĕн спортсменĕсем пьедесталăн иккĕмĕш картлашки çине хăпарма тивĕçнĕ. Райпора тăрăшакан Александр Максимов "Йĕлтĕрпе чи хăвăрт чупакан арçын" ятне çĕнсе илнĕ. Н.ПЕТРОВА.
Источник: "Пирěн пурнăç"