17 марта 2017 г.
Мартăн 11-мĕшĕнче Етĕрнере "Техник" суту-илỹ çурчĕн парнисемшĕн ишевçĕсен уçă ăмăртăвĕ иртрĕ. Ăмăртăва районти "Хастар" ФСК вĕренекенĕсем те хутшăнчĕç. Пур ỹсĕмри ушкăнсенчи ишевçĕсем ирĕклĕ майпа тата çурăм çинче 50 метрлă дистанцисене парăнтарчĕç.
Аслă ушкăнри яшсем (2000 çулта çуралнисем тата унтан аслăраххисем) хушшинче Владимир Магаськин виççĕмĕш вырăн йышăнма пултарчĕ. 2003-2004 çулсенче çуралнă арçын ачасем хушшинче Егор Секайкина çитекенни пулмарĕ. Вăлах çурăм çинче ишсе виççĕмĕш вырăна тухрĕ. Çак ỹсĕмри хĕрачасем хушшинче Лиза Ягодкина икĕ дистанцие парăнтарса виççĕмĕш вырăнсене тивĕçрĕ. 2005-2006 çулсенче çуралнă ишевçĕсем хушшинче Надя Васюкова икĕ хутчен пьедесталăн иккĕмĕш картлашки çине тăчĕ. Настя Капралова та икĕ хутчен виççĕмĕш вырăн йышăнчĕ. Арçын ачасем хушшинче Павел Секайкин иккĕмĕш вырăна тивĕçрĕ, Артем Трифонов - виççĕмĕш.
Çурăм çинче ишекенсем хушшинче Никита Богаткин иккĕмĕш пулчĕ. Чи çамрăк ишевçĕсем хушшинче Вадим Иванов иккĕмĕш вырăн йышăнчĕ. Турнир хутăш эстафетăпа вĕçленчĕ. 2005-2006 çулсенче çуралнă арçын ачасемпе хĕрачасен командисем хушшинче хĕрлĕчутайсен команди - Таня Ягункина, Настя Капралова, Артем Трифонов тата Павел Секайкин - иккĕмĕш вырăна тивĕçрĕ. 2003-2004 çулсенче çуралнисем хушшинче вара "Хастарăн" командине, вĕсем - Надя Васюкова, Лиза Ягодкина, Федя Ябыков тата Егор Секайкин - çитекен пулмарĕ.
Ю.СТОЛЯРОВ, тренер-преподаватель.
Источник: "Пирěн пурнăç"