22 марта 2017 г.
Иртнĕ канмалли кунсенче Чăваш Ен делегацийĕ Михаил Игнатьев ертсе пынипе Мурманск облаçĕн губернаторĕн çумĕпе Алексей Тюкавинпа тĕл пулса малаллахи ĕçлĕ килĕшỹсене сỹтсе явнă. Сăмах май, Мурманск облаçĕнче хальхи вăхăтра тăватă пине яхăн чăваш пурăнать, наци культурин организацийĕ ĕçлет. Çыхăнусене çирĕплетсе тĕлпулура суту-илỹпе экономика, наукăпа техника тата культура енĕпе килĕшỹсем тунă. Михаил Игнатьев çар мухтавĕн Полярный хулине - Çурçĕр флочĕн Мурманск облаçĕнчи тĕп çар базине - çитсе курнă.
Çурçĕр флочĕн Кольски флотилийĕн командующийĕн çумĕ Александр Пешков сăмахĕ тăрăх, хальхи вăхăтра Мурманск облаçĕнче карапсем тата шыв айĕн çỹрекен кимĕсем çинче Чăваш Республикинчи çĕр-çĕр çамрăк çар тивĕçне тỹрĕ кăмăлпа тата шанчăклă пурнăçлать. Шефла çыхăнусем те лайăх аталаннă. Республика Пуçлăхĕ Михаил Игнатьев пулăшу панипе Чăваш Енри 100 ытла çын паян "Адмирал Кузнецов" авианосец çинче тата "Ядрин" çар карапĕн флотилийĕн йышĕнче службăра тăрать. Полярный хулинче пулнă май Михаил Игнатьев флотилин команда тытăмĕпе тата службăра тăракан ентешсемпе тĕл пулнă.
Çар тивĕçне пурнăçлакан моряксемшĕн, салтаксемшĕн тата кунта контрактпа службăра тăракансемшĕн Чăваш Республикин халăх артистки Августа Уляндина ертсе пыракан "Ярды" тата "Дуняша" фольклор ушкăнĕсен концерчĕ пысăк парне пулнă. Палăртма кăмăллă, темиçе çул ĕнтĕ "Ярды" ушкăнра пирĕн ентеш, Мучикассинчи Екатерина Мурайкина юрлать. Вăл Мурманск облаçĕнче хальхи вăхăтра "Адмирал Кузнецов" авианосец çинче контрактпа службăра тăракан, унччен Хĕрлĕ Чутай шкулĕнче пĕрле вĕреннĕ Дмитрий Мидейкинпа тĕл пулнă. Çак тĕлпулу Димăшăн пысăк кĕтменлĕх пулнă. Екатеринăпа иккĕшĕ вĕсем хаваспах сăн ỹкерĕннĕ, ăна Дима "Инстаграма" кăларса хунă.
А.ДМИТРИЕВА.
Источник: "Пирěн пурнăç"