24 марта 2017 г.
Кăçал Хĕрлĕ Чутайри вăтам шкулта вĕренекен çичĕ çамрăк Чăваш Республикин Пуçлăхĕн Михаил Игнатьевăн ятран паракан стипендине тивĕçрĕ, вĕсенчен пĕри - 11 А класра вĕренекен Юрий Тимофеев.
Юрий Ишеккасси ялĕнче пурăнать. Эп хам та çак ялта çуралса ỹснĕрен Юра пирки куç умĕнчех ỹссе тĕрекленчĕ тесе калама пултаратăп. Çак сăпайлă та сăмах нумай ваклама, хăйĕн ăнăçăвĕсемпе мухтанма юратман яшăн спортри çитĕнĕвĕсене асăрхасах тăраттăм. Спорта тĕллевлĕн ура ярса пуснăскер, тренерсем пулăшнипе тата хăй тăрăшнипе çитĕнỹ хыççăн çитĕнỹ тăваканскер вăл, ман шутпа, хисепе кăна тивĕç.
Юра ытларах ишме кăмăллать. Районта "Хастар" физкультурăпа спорт комплексĕ уçăлнăранпа вăл унти бассейнран туха та пĕлмен пулĕ. Çулсерен тĕрлĕ шайри ăмăртусене хутшăнать, малти вырăнсене йышăнать. Юрий Тимофеев çăмăл атлетикăра та хăйне пĕрре кăна мар тĕрĕсленĕ, триатлон, акватлон енĕпе ăмăртусене хутшăннă. Юрий Столяров тренер çамрăк спортсмена мухтать, нумаях пулмасть Юра триатлон енĕпе спорт мастерĕн кандидачĕн нормативĕсене пурнăçланине палăртать.
Ачан çитĕнĕвĕсем чи малтанах камран килеççĕ? Тĕрĕс, хăйĕнчен, ашшĕ-амăшĕнчен тата вĕрентекенсенчен. Юра хăй питĕ тăрăшуллă пулнине палăртрăмăр ĕнтĕ. Шел те, темиçе çул каялла чире пула Юрăн ашшĕ пурнăçран уйрăлса кайрĕ. Ун чух Юрăна мĕнле йывăр пулнине вăл хăй кăна пĕлет пулĕ. Амăшĕ, асламăшĕ, йăмăкĕ тата ытти çывăх тăванĕсем, юлташĕсем пурри, вĕсем пулăшни ăна вăй кỹрсе тăчĕ пулĕ - Юра вĕренỹре те ĕлкĕрсе пычĕ, спортра та палăрчĕ.
Вĕрентекенĕсене илес пулсан, 5-9-мĕш классенче Юрăна физкультурăпа Галина Мидюкова (Мидейкина) вĕрентнĕ,10-мĕш класран пуçласа - Эдуард Романов. Ишес ăсталăхне туптама вара чи малтанах Людмила Михуткина тренер пулăшнă, халĕ - Юрий Столяров. Юрий Тимофеев пĕлтĕр Хĕрлĕ Чутай шкулĕн салтак çулне çитмен çамрăкĕсемпе пĕрле Краснодар хулинче иртнĕ Спартакиадăна та хутшăнчĕ, хăйне лайăх енчен кăтартса пачĕ. Аса илтеретĕп, ун чух хĕрлĕчутайсем Раççей шайĕнчи ăмăртуран иккĕмĕш вырăн йышăнса таврăнчĕç.
Пĕлтĕрех Юра хăй вĕренекен шкул командин йышĕнче Анапăра иртнĕ Пĕтĕм Раççейри шкул ачисем хушшинчи вăй-хал хатĕрленĕвĕн смотрĕнче пулчĕ. Хура тинĕс хĕрринчен вĕсем çĕнтерỹпе таврăнчĕç, Юра вара унта уйрăм кăтартăвĕпе палăрнă, ишес енĕпе пĕрремĕш вырăн йышăннă.
Халĕ Юрий Тимофеев ыттисемпе танах патшалăх экзаменĕсене хатĕрленет. Шкултан вĕренсе тухсан вăл пуласлăхне çарпа çыхăн-тарасшăн. Юлашкинчен çакна каласа хăварас килет: çамрăксене республика Пуçлăхĕн ятран паракан стипендийĕпе чыслани - вĕсен пултарулăхне пысăк хак пани, малалла аталанма пулăшни, вĕсем тăван тăрăхшăн тăрăшнине çирĕплетни. Çак кунсенче 17 çул тултаракан Юрăн ырă енĕсем малашлăхăн пысăк та çутă çулĕ çине тухсассăн та ан иксĕлччĕр, спортри çитĕнĕвĕсем те пысăк пулччăр.
А.КАРПОВА.
Источник: "Пирěн пурнăç"