24 марта 2017 г.
Мартăн 25-мĕшĕнче пирĕн çĕршывра Культура ĕçченĕн кунне паллă тăваççĕ, апла пулсан районти культура тытăмĕнче тăрăшса ĕçлекенсем, талантлă çынсем, пултарулăхпа палăракансем хăйсен професси уявне паллă тăваççĕ.
Пирĕн тăрăхри культурăна аталантарассишĕн тăрăшакансем пурте ырă сăмаха тивĕç. Вĕсем тăтăшах тĕрлĕ шайри конкурссемпе фестивальсене хутшăнаççĕ, малти вырăнсене йышăнаççĕ. Акă çак кунсенче кăна республикăри халăх театрĕсен "Яланах - театр" фестивальне районти Культура çурчĕн артисчĕсем хутшăнчĕç. Муркашра иртнĕ фестивальте вĕсем Ольга Сергеева режиссер лартнă "Хуняма" камите питĕ ĕненмелле, чун-чĕрене хумхатмалла калăпласа панă.
Районта та эпир тăтăшах тĕрлĕ фестивальсемпе конкурссем ирттеретпĕр.Хальхи вăхăтра ял тăрăхĕсенче "Çуралнă çĕршывшăн чĕремĕр юрлать" смотр-отчет пырать, ăна Экологи тата Амăшĕпе Ашшĕн çулталăкĕсене, район юбилейне халалларăмăр.
Пултарулăх коллективĕсен чи лайăх номерĕсене апрелĕн 12-мĕшĕнче районти Культура çуртĕнче иртекен гала-концертра курма пулĕ.
Александр САМСОНОВ, райадминистрацин культура, спорт тата архив ĕçĕн пай начальникĕ.
Источник: "Пирěн пурнăç"