29 марта 2017 г.
Мартăн 24-мĕшĕнче Улатăрта ЧР культура министрĕ Константин Яковлев хутшăннипе уяв мероприятийĕ иртнĕ. Культура ĕçченĕн кунне халалланă уявра министр пухăннисене тĕрлĕ шайри наградăсем парса чысланă. Хисепе тивĕçнисем хушшинче хĕрлĕчутайсем те пур. Культура аталанăвне пысăк тỹпе хывнăшăн, нумай çул хушши тухăçлă ĕçленĕшĕн район администрацийĕн культура, туризм тата архив ĕçĕн пай начальникне Александр Самсонова Раççей Федерацийĕн культура министрĕн Тав çырăвне парса чысланă.
Нумаях пулмасть республикăри культура тытăмне кĕрекен организацисем хушшинче професси ăсталăхĕн конкурсĕ иртнĕччĕ. Районти Ачасен искусство шкулĕ çак конкурса хутшăнса "Чи лайăх муниципаллă ачасен искусство шкулĕ" номинацире çĕнтернĕ. Искусство шкулĕн директорне Венера Молодейкинана 150 пин тенкĕпе танлашакан сертификат панă. Çак укçана федераллă тата республика бюджечĕсенчен уйăрнă.
А.КАРПОВА.
Источник: "Пирěн пурнăç"