17 мая 2008 г.
Кăçалхи апрель уйăхĕн вĕçĕнче «Ĕç сыхлавĕн чи лайăх специалисчĕ» ята çĕнсе илессишĕн республикăри професси ăсталăхĕн конкурсĕн районти тапхăрĕ иртнĕ. Тупăшăва предприятисемпе организацисенчен чылаййăн хутшăннă. Конкурс кăтартăвĕсем тăрăх ММППЖКХри ĕç сыхлавĕн специалисчĕ Илья Гаврилов çĕнтерÿçĕ пулса тăнă. Вăл хăйĕн тивĕçне чыслăн пурнăçласа пырать, коммуналлă хуçалăх предприятийĕнче ĕçлекенсене ĕç сыхлавĕн правилисене çирĕп пăхăнма хăнăхтарать.
Ĕç сыхлавĕ енĕпе ирттернĕ уйăхлăх пĕтĕмлетĕвĕсене районти ĕçлĕ комисси ларĕвĕнче пăхса тухнă. Ĕç сыхлавĕпе условийĕсене тишкерсе çитменлĕхсене палăртса хăварнă, организацисемпе предприятисене кăлтăксене пĕтерме хушнă. Уйăхлăх кăтартăвĕсене тĕплĕнрех координаци канашĕн анлă ларăвĕнче сÿтсе яваççĕ.
Пĕтĕмĕшле илсен, ĕç сыхлавне тата условийĕсене лайăхлатас тĕлĕшпе куллен ĕçлемелле. Çакă кашни ĕçченĕн сывлăхĕпе тата пурнăçĕпе тачă çыхăннине манар мар.