24 мая 2008 г.
– Чăваш Республикин Президенчĕ Н.В.Федоров “Чăваш Республикинче ялти культура учрежденийĕсене аталантарас енĕпе пурнăçламалли мерăсем çинчен” йышăннă Указ пирĕн ума çĕнĕ тĕллевсем кăларса тăратрĕ, – тет Атнар ял тăрăхĕн пуçлăхĕ А.Н. Кузнецов. – Халĕ ял халăхĕн канăвĕшĕн, унăн пушă вăхăтне усăллă та интереслĕ ирттерессишĕн ытларах тăрăшмалла.
Çак задачăна ăнăçлă татса парас тесе ĕнтĕ модельлĕ клубсем йĕркелеме палăртнă. 2008-2010 çулсенче ку енĕпе чылай ĕçсем туса ирттермелле. Çак ыйтупа Атнарти Культура çуртĕнче ЧР Культура министерствин представителĕсем пулнă, унти лару-тăрупа паллашнă. Чи малтан асăннă культура учрежденине модернизацилеме палăртнă-çке.
Кунти Культура çуртне тĕпрен юсаса çĕнетнĕ, тăррине çутă шăвăçпа витнĕ. Урайпа маччана, стенасене, чÿречесене, алăксене йĕркене кĕртсе çитернĕ. Ăшă системи те йĕркеллĕ ĕçлет. Пĕтĕмĕшле 400 пин тенкĕлĕх ытла юсав ĕçĕсем тунă. Ял тăрăхĕн пуçлăхĕ Г.Шуськин директор хастарлăхĕпе кăмăллă.
– Культура учрежденийĕсене модернизацилес тĕллевпе ял тăрăхĕн администрацийĕ тăкакланă укçа-тенкĕ сая каймасть, – тет Александр Николаевич. – Кĕçех пире республика кирлĕ оборудованипе, музыка аппаратурипе, костюмсемпе тивĕçтерĕ.