28 мая 2008 г.
Республика тĕп хулинче – Шупашкарта тухса тăракан “Халăх шкулĕ” журнал редакцийĕ чăвашсене çутта кăларнă И.Я.Яковлев 160 çул тултарнине халалласа виçĕ номинаципе çыравçăсен конкурсне ирттернĕ. Конкурса пирĕн ентеш, Штанашри пĕтĕмĕшле пĕлÿ паракан тĕп шкулти Г.В.Зотова учительница та хутшăннă. Вăл “Ăслăлăхпа педагогикăн чи лайăх статйи” номинацире иккĕмĕш степеньлĕ Диплом илме тивĕçнĕ.
Галина Вячеславовна “Вăл Чĕмпĕр шкулĕнче вĕреннĕ” ятпа материал çырса журналта пичетленĕ. Унта Штанашри вăтам шкулта ĕçленĕ Георгий Ильич Ильин вĕрентекен пурнăçĕпе ĕç-хĕлне сăнласа кăтартнă. Çакă интереслĕ – Г.Ильин Чĕмпĕрти учительсем хатĕрлекен шкулта чăвашсен паллă поэчĕпе К.В.Ивановпа пĕрле вĕреннĕ. Хăй 50 çул тултарнă хыççăн Чăваш педагогика институтĕнче куçăмсăр майпа аслă пĕлÿ илсе дипломлă пулса тăнă.
Г.В.Зотован çырас туртăмĕ вăйлă. Вăл район, республика хаçачĕсемпе çирĕп çыхăну тытать. Унăн статйисем Мускаври “Учительская газета” хаçатра та тăтăшах пичетленеççĕ. Малашне те Галина Вячеславовнан пултарулăхĕ çăл куç пек тапса тăтăр!