28 мая 2008 г.
Пултаруллă, çунатлă ĕмĕт-тĕллевлĕ çамрăксемпе ĕçлеме те çăмăл, интереслĕ те. Çакна чылай çĕрте ăнланаççĕ, вĕсене хастар, пуçаруллă пулма условисем туса пама тăрăшаççĕ. Акă, Алена Сапожникова пирки сăмах пуçарар.
Алена, Атнарти вăтам шкулта 11-мĕш класс вĕренсе пĕтерет. Хăй вăл Березовка ялĕнчен. Шкул автобусĕ çÿреме пуçланăранпа Атнара пĕлÿ илме çÿрет.
– Шкула хавхаланса, тулли кăмăлма утатăп. Учительсем пире çирĕп пĕлÿ парассишĕн ырми-канми тăрăшаççĕ. Уроксем интереслĕ иртеççĕ. Класс ертÿçи Е.А.Шорникова вĕренекенсен шухăш-кăмăлĕпе интересленсех тăрать, вĕсен пушă вăхăтне усăллă ирттерессишĕн чунтанах тимлет. Çавăн пекех Елена Альвовна çамрăк çыравçăсен “Юнкор” кружокне ертсе пырать. Вăл пулăшнипе манăн статьясем хаçатсенче кун çути кураççĕ, – терĕ Алена.
Çапла, Атнарти вăтам шкула вĕренме куçсан хĕр ачан статьясем çырас туртăмĕ вăйланнă. Кăна чăваш чĕлхипе литературине юратса вĕреннипе те ăнлантармалла. Паллах, учителĕн тÿпи пысăк кунта. Елена Альвовна пулăшнипе çамрăк тăван чĕлхен кăткăслăхне алла илсе пырать.
Алена хăй çырнă хайлавсене “Тантăш”, “Пирĕн пурнăç” хаçатсене ярса тăрать. 2004 çулта вăл хăй ĕçĕсемпе “Тантăш” хаçатăн лауреачĕ пулнă. 2007 çулта республикăри “Çамрăк çыравçăсем” конкурса хутшăннă – ЧР Вĕрентÿ министерствин Дипломне тивĕçнĕ. Район хаçачĕн страницисенче те Алена Сапожникован ĕçĕсем час-часах пичетленеççĕ. Шкул пурнăçĕ, ырă ĕçсем çинчен çырма кăмăллать хĕр.
Аленăн ĕмĕчĕсем çунатлă. Пурнăçне вăл журналистикăпа çыхăнтарасшăн.