31 мая 2008 г.
Тралькассинчи пĕтĕмĕшле пĕлÿ паракан тĕп шкул директорĕн вĕрентÿпе воспитани енĕпе ĕçлекен çумне Н.В.Ермакована палламан-пĕлмен çын районта сахал пулĕ. Вăл пĕлтĕр Чăваш Республикин Президенчĕн 100 пин тенкĕлĕх, кăçал Раççей Президенчĕн 100 пин тенкĕлĕх гранчĕсене тивĕçнĕ. Ку кăна-и; Надежда Васильевна вĕрентÿ ĕçĕнче усă курма 30-а яхăн методика кăтартăвĕсем хатĕрленĕ. Тралькасси тăрăхĕнче çуралса ÿснĕ ăсчах ятне тивĕçнĕ çынсем пирки çырнисем те пур унăн.
Кăçалхи майăн 9-мĕшĕнче эпир Тăван çĕршывăн Аслă вăрçинче çĕнтерÿ тунăранпа 63 çул çитнине паллă турăмăр. Çав ятпа Н.Ермакова Карăкçырми тата Шуккакасси ялĕсенчен фронта тухса кайнă, анчах çĕршывăн никама пăхăнманлăхĕпе ирĕклĕхне хÿтĕлесе пуçĕсене хунă 82 салтак ятне палăртса, хăш-пĕрисен сăн ÿкерчĕкĕсене вырнаçтарса брошюра кăларнă. Автор ку темăпа малалла ĕçлесшĕн. Мĕншĕн тесен вăрçа хутшăннисен паттăрлăхĕпе хăюлăхĕ çамрăкрах ăру çыннисен чĕрисенче ĕмĕр-ĕмĕр упранĕ.