31 мая 2008 г.
Ĕнер «Хĕвел» ача садĕнчи вăтам ушкăнра Пĕтĕм тĕнчери ачасене хÿтĕлемелли куна халалласа З.В.Федорова тата М.И.Вазина воспитательсем уяв ирттерчĕç. Ăна ачасене спортпа туслă пулма хăнăхтарас, вĕсен художествăлла пултарулăхне аталантарас тата театрализациленĕ ĕçпе паллаштарас тĕллевпе йĕркеленĕ. Вăтам ушкăнри ачасем, çавăн пекех вĕсен ашшĕ-амăшĕсем, ытти ушкăнри пепкесем те «Асанне, асатте тата йăва» спорт юмахне пăхрĕç, унти сăнарсемпе пĕрле тĕрлĕ хусканусем пурнăçларĕç, вăйăсем вылярĕç, спорт инвентарĕсемпе паллашса пычĕç. Калас пулать, ку ĕçре педагогсене ашшĕ-амăшĕсем те пулăшрĕç, тăваттăн юмахри сăнарсем пулчĕç. Ятарлă çи-пуç тăхăннă сăнарсемпе пĕрле хутшăнма, выляма ачасене питĕ интереслĕ пулчĕ, вĕсене кашни самант кăсăклантарчĕ.
Уяв ачасен кăмăлне самаях çĕклерĕ, вĕсен тавра курăмне анлăлатрĕ. Вăл тухăçлă иртни пĕрре те иккĕлентермест.