07 июня 2008 г.
Район прокуратури выльăх-чĕрлĕх чирĕсене хирĕç кĕрешекен станци специалисчĕсемпе пĕрле выльăх масарĕсемпе усă курнă чухне хăрушсăрлăх енĕпе саккунлăха мĕнле пăхăннине тĕрĕсленĕ. Пурĕ 24 масар çине çитсе курнă, лару-тăрăва тишкернĕ. Тĕрĕслев çакна кăтартса пачĕ: районти виçĕ ял тăрăхĕн территорийĕнче тăхăр масар Патшалăхăн тĕп ветеринари инспекторĕ 1995 çулхи декабрĕн 4-мĕшĕнче çирĕплетнĕ биологи каяшĕсене пухнă, вĕсене пăрахăçланă тата пĕтернĕ чухне усă курмалли 13-7-2Ÿ469 номерлĕ ветеринарипе санитари правилисен ыйтăвĕсене тивĕçтереймест.
Тĕслĕхрен, Хĕрлĕ Чутай ял тăрăхĕнчи икĕ выльăх масарĕн территорийĕсенче (Ишеккассинчи тата Пчелкăри) кăтартса çырнине çĕнетмен, тавралла тытнă карта çÿллĕшĕ 1 – 1,2 метр кăна. Хÿме вара 2 метртан кая кирлĕ пулмалла мар. Тралькасси ял тăрăхне кĕрекен Тралькасси, Карăкçырми, Кив Ирчемес, Хăмаркка тата Турхан çывăхĕнчи масарсем çинче çÿлерех асăннă çитменлĕхсемсĕр пуçне хăш-пĕр çĕрте карта пачах çук, унăн каштисем çĕрсе кайнă, кăçал юсав ĕçĕсем туман. Мăн Этменпе Уйпуç çумĕнчи выльăх масарĕсенче те йĕрке сахалрах.
Тепĕр çĕрте масар çывăхĕнчи санитарипе хÿтлĕх зонине пăхăнмаççĕ. Юнашарах ĕне выльăх йĕррисем палăраççĕ. Кунта кĕтĕве çÿретме юрамасть.
Район прокуратури çÿлерех асăннă ял тăрăхĕсен пуçлăхĕсем тĕлĕшпе РФ право йĕркин административлă Кодексĕн 10.6 статйипе виçĕ ĕç пуçарнă.